Një punonjës i OSHEE-së ka humbur jetën në orët e para të mëngjesit të sotëm, gjatë një ndërhyrjeje për riparimin e një defekti në rrjetin elektrik në zonën e Himarës.
Sipas informacioneve paraprake, bëhet me dije se ngjarja ka ndodhur rreth orës 03:00, në momentin kur ekipet teknike po punonin për të rikthyer energjinë elektrike në zonat e prekura nga moti i keq dhe erërat e forta.
Viktima është 55-vjeçari Bashkim Boçi nga Elbasani, i cili ishte dërguar në Himarë për t’u ardhur në ndihmë ekipeve që po punonin në terren për riparimin e dëmtimeve të shkaktuara në rrjetin elektrik.
Dyshimet e para tregojnë se punonjësi mund të ketë rënë në kontakt me rrymën elektrike, megjithatë shkaku i saktë i vdekjes do të përcaktohet vetëm pas përfundimit të hetimeve dhe ekspertizës teknike.
Policia dhe grupi hetimor kanë nisur menjëherë veprimet në vendngjarje për të dokumentuar rrethanat e ngjarjes.
Stuhia, e shoqëruar me erëra të forta, shkaktoi dëme të shumta në jug të vendit, duke rrëzuar pemë, dëmtuar automjete dhe lënë pa energji elektrike disa zona.
Discussion about this post