Deputeti i PD-së, Flamur Noka, reagoi ashpër ndaj deklaratave të ministrit të Brendshëm, Besfort Lamallari, duke e akuzuar qeverinë për lidhje me segmente kriminale dhe duke sulmuar mënyrën e menaxhimit të situatës jashtë Kuvendit.
“Teksa dëgjon këtë ministër ndjen keqardhje për nivelin ku është katandisur shteti shqiptar. Ka turp më të madh! Po ç’ministër je ti? Je ushtar i Oltion Bistrit. Ju s’keni lidhje me shtetin, keni lidhje me bandat”, deklaroi Noka.
Debati vijoi edhe me kreun e Grupit Parlamentar të PS-së, Taulant Balla, i cili më herët kishte akuzuar opozitën se nuk është distancuar nga aktet e dhunshme gjatë protestës dhe kërkoi që Kuvendi të mbajë një qëndrim të qartë kundër sulmeve ndaj policisë.
Në kundërpërgjigje, Noka përdori tone të ashpra ndaj Ballës, duke e akuzuar atë dhe qeverinë për lidhje me persona të inkriminuar.
“Të ka përdhunuar përdhunuar Edi Rama, Gys Agasi, prandaj ti e ke qejf përdhunimin sepse je rritur mes përdhunimesh”, tha Noka.
Përplasjet nisën pas diskutimeve mbi ndërhyrjen e policisë ndaj protestuesve jashtë Kuvendit. Deputeti demokrat Agron Gjekmarkaj akuzoi qeverinë për mungesë reagimi dhe kërkoi shpjegime për lëndët e përdorura nga policia gjatë shpërndarjes së turmës.
“Zoti Lamallari duhet të vijë këtu dhe të japë shpjegime për substancat që po përdoren kundër tyre, të pazakonta që po ju shkaktojnë djegie trupi. Ambulancat shkojnë e vijnë”, deklaroi Gjekmarkaj.
Sipas tij, opozita duhet të distancohet nga personat që përdorin dhunë gjatë protestave, duke akuzuar se disa prej tyre po përpiqen të krijojnë tensione përmes personave me kapuç.
“Partia e molotovarëve” dhe “partia e skuthave” ishin disa nga etiketimet e përdorura nga Lamallari gjatë debatit, ndërsa ai deklaroi se Policia e Shtetit po kryen detyrën e saj për garantimin e sigurisë.
Përplasjet verbale në Kuvend u zhvilluan paralelisht me protestën jashtë Parlamentit, ku pati përplasje mes protestuesve dhe policisë, përdorim uji me presion, gaz lotsjellës dhe mjete të tjera irrituese.
Discussion about this post