Futbollisti australian Cristian Volpato është përfshirë në një skandal jashtë fushës, pasi ka rezultuar pozitiv në një test paraprak për kokainë pas një kontrolli policor në Sydney.
Mesfushori 22-vjeçar i Sassuolos u ndalua nga policia teksa po drejtonte një BMW me 109 km/h në një zonë ku kufiri i lejuar ishte 60 km/h.
Pas ndalimit, ai iu nënshtrua një testi të shpejtë për drogë, i cili rezultoi pozitiv për kokainë.
Megjithatë, çështja nuk është mbyllur ende. Autoritetet kanë marrë një mostër të dytë të pështymës, e cila është dërguar për analiza laboratorike.
Deri në publikimin e rezultateve përfundimtare, ndaj Volpatos nuk është ngritur asnjë akuzë penale për përdorim të lëndëve narkotike.
Për shkeljet në trafik, futbollisti është gjobitur dhe i është pezulluar leja ndërkombëtare e drejtimit për gjashtë muaj në shtetin australian të New South Wales.
Policia bëri të ditur gjithashtu se ai ishte ndaluar edhe pak orë më herët për tejkalim shpejtësie, ndërsa testi i alkoolit kishte rezultuar negativ.
Volpato, i lindur në Sydney, kishte përfaqësuar më parë Italinë në ekipet e moshave, por pak para Kupës së Botës 2026 vendosi të luante për Australinë.
Ai regjistroi tre paraqitje me kombëtaren australiane në Botëror.
Në nivel klubesh, 22-vjeçari aktivizohet me Sassuolon në Serie A, ndërsa më parë ka qenë pjesë e Romës, ku debutoi në elitën e futbollit italian.
Discussion about this post