Një 37-vjeçar është vënë në pranga, pasi dyshohet se mashtronte qytetarët duke u marrë paratë për riparimin e automjeteve. Blutë bëjnë me dije se disa raste, ai dyshohet se ka tentuar edhe t’i shiste automjetet që i ishin lënë në servis. Gjatë hetimeve u dokumentuan 6 raste mashtrimi, ku Mirjan Hasa, dyshohet se ka marrë pagesa nga klientët për riparimin e mjeteve, por nuk ka përmbushur detyrimet e tij. Ndërkohë, po punohet për dokumentimin e rasteve të tjera në këtë fushë, që mund të ketë kryer 37-vjeçari.
Njoftimi i policisë:
Tiranë/Finalizohet nga Komisariati Nr. 6, operacioni i koduar “Skema”. Arrestohet pronari i një servisi automjetesh në Astir, për mashtrim. Dokumentohen 6 raste të kësaj veprimtarie kriminale, të kryera nga ky shtetas. I arrestuari, përveçse nuk ka riparuar automjetet për të cilat është paguar, në disa raste ka tentuar t’i shesë ato. Sekuestrohen nga ambientet e subjektit, 5 automjete, të cilat iu lanë në ruajtje pronarëve të tyre.
Si rezultat i veprimeve hetimore dhe procedurale, të kryera menjëherë pas kallëzimeve të disa qytetarëve, se nuk kishin iu ishin riparuar automjetet, pavarësisht se i kishin paguar paratë, pronarit të një subjekti në këtë fushë, në zonën e quajtur “Astiri”, specialistët për Hetimin e Krimeve të Komisariatit të Policisë Nr. 6 finalizuan operacionin e koduar “Skema”.
Në kuadër të operacionit u arrestua shtetasi i dyshuar për veprën penale “Mashtrimi”, M. H., 37 vjeç, si dhe u dokumentuan 6 raste të kësaj veprimtarie kriminale. Përveç mashtrimit, nga hetimet dyshohet se në disa raste, 37-vjeçari ka tentuar të shesë automjetet që i ishin lënë për riparim. Punohet për dokumentimin e rasteve të tjera në këtë fushë, që mund të ketë kryer shtetasi M. H. Materialet procedurale iu referuan Prokurorisë së Tiranës, për veprime të mëtejshme.
Discussion about this post