Protesta kundër ndërtimit të hekurudhës në veri të Italisë, 700 të maskuar sulmojnë kantierin, 150 karabinierë të plagosur

Një proteste me rreth 20 mijë pjesëmarrës në Val di Susa, në veri të Italisë, degjeneroi dje në përleshje të dhunshme, pasi një grup prej rreth 700 personash të maskuar u shkëput nga marshimi dhe sulmoi kantierin e linjës hekurudhore të shpejtësisë së lartë Torino-Lion. Përplasjet me policinë, karabinierët dhe Guardia di Finanza lanë një bilanc që, sipas përditësimit më të fundit, shkon drejt 150 efektivëve të plagosur.

Marshimi nisi nga Venaus në kuadër të festivalit “Alta Felicità”, aktiviteti tradicional i lëvizjes No Tav, e cila kundërshton ndërtimin e linjës hekurudhore Torino-Lion. Fillimisht protesta u zhvillua pa incidente, por më pas kortezhi u nda në dy pjesë. Një grup mori rrugën drejt Susa, ndërsa tjetri, duke kaluar nëpër shtigjet e pyllit, mbërriti pranë kantierit të Chiomonte.

Rreth orës 16:30, grupi i të maskuarve hapi një çarje në rrethimin e kantierit dhe hyri në kantier, duke u përplasur me forcat e rendit. Gjatë incidenteve u hodhën gurë, bomba artizanale, fishekzjarre dhe kokteje molotov, ndërsa katër mjete të forcave të rendit u përfshinë nga flakët.

Bilanci i të plagosurve u rrit gjatë ditës. Deri në përditësimin e fundit raportoheshin 68 karabinierë, 18 efektivë të Guardia di Finanza, dy prej të cilëve mbeteshin nën vëzhgim, dhe rreth 50 policë të plagosur, ndërsa autoritetet po vijojnë verifikimet.

Përplasjet sollën reagime të menjëhershme nga drejtuesit e shtetit italian. Presidenti Sergio Mattarella telefonoi ministrin e Brendshëm Matteo Piantedosi për të shprehur “solidaritetin dhe mirënjohjen për veprimin e forcave të rendit në shërbim të komunitetit kombëtar”, si edhe afërsinë e tij me efektivët e plagosur.

Ministri i Brendshëm Matteo Piantedosi tha se ngjarjet konfirmojnë “vullnetin e disave për të krijuar një përshkallëzim që kërkon vëmendje maksimale”, duke bërë thirrje për “një qëndrim të bashkuar, të qartë dhe pa asnjë paqartësi nga të gjitha forcat politike dhe institucionet”.

Edhe kryeministrja Giorgia Meloni dënoi dhunën, duke deklaruar se “ata që hedhin bomba artizanale, u vënë flakën mjeteve të shtetit dhe sulmojnë forcat e rendit nuk po mbrojnë një ide, por po sulmojnë shtetin”. Ajo shtoi se “dhuna nuk do ta përkulë shtetin” dhe se “ata që i shërbejnë Italisë nuk do të lihen kurrë vetëm”.

gijotina.com/