Një ditë pasi kryeministri Edi Rama u kujtoi kryebashkiakëve detyrën e tyre për t’u shprehur me shkrim për projektin e ndarjes së re territoriale, disa nga bashkitë që preken duke u shkrirë, kanë nisur të organizohen për të mbajtur zyrtarisht qëndrimin e tyre.
Libohova, që sipas draftit të mazhorancës pritet t’i bashkohet Gjirokastrës, është e para që ka mbledhur këtë të hënë Këshillin Bashkiak, ku si rrallë herë të majtë e të djathë janë bërë bashkë: kundër shkrirjes së bashkisë Libohovë. Këtë qëndrim unanim të të gjithë këshilltarëve bashkiak pritet t’ia çojnë qeverisë me shpresën se vendimi i tyre do të merret parasysh.
Edhe bashkia Klos, e cila pritet t’i bashkohet Matit do të mbajë qëndrimin e saj zyrtar. Anëtarët e Këshillit Bashkiak kanë kërkuar një mbledhje urgjente, ku pritet të diskutohet qëndrimi institucional i këshillit ndaj projektit të reformës administrativo-territoriale.
Këshilltarët propozojnë që në mbledhje të shqyrtohet ndikimi i reformës, të miratohet një rezolutë zyrtare kundër shkrirjes së Bashkisë Klos, kjo rezolutë t’u dërgohet Kuvendit, Këshillit të Ministrave dhe institucioneve të tjera përgjegjëse, si edhe të organizohen konsultime publike me qytetarët në të gjitha njësitë administrative të bashkisë.
Ndërsa në Rrogozhinë, e cila pritet të bashkohet me Kavajën janë punonjësit e bashkisë ata të cilët e kanë kundërshtuar bashkimin duke pezulluar për pak çaste punën mëngjesin e kësaj të hëne, në shenjë demonstrative kundër propozimit të socialistëve. Ata thonë se ndihen të tradhtuar nga kupola e PS ndërsa kërkojnë me ngulm që Rrogozhina të mbetet Bashki më vete pasi sipas tyre rrezikon të humbasë identitetin e saj.
“Unë si qytetar i Rrogozhinës jam kundër kësaj reforme sepse Bashkia Rrogozhinë nuk i plotëson kushtet dhe kriteret që ka vendosur qeveria që të shkrihet si bashki dhe të bashkohet me Kavajën. Kush na siguron ne që duke u bashkuar me Kavajën do rriten shërbimet për qytetarët e Rrogozhinës? Është e papranueshme që Bashkia të shkrihet.”
Bashkisë Rrogozhinë po i bëhet një padrejtësi shumë e madhe. Ne si Bashki i plotësojmë të gjitha kriteret për të qëndruar si Bashki si burimet njerëzore ashtu edhe financiare.”, shprehen ata.
Një tjetër bashki që kundërshton shkrirjen është ajo e Patosit e cila pritet t’i bashkohet Fierit. Qytetarët thonë se ky vendim cenon identitetin e qytetit të naftëtarëve dhe rrezikon shpopullimin e qytetit me largimin e shërbimeve.
“Bashkia e Patosit është një identitet i pandashëm, por që funksionon si unitet më vete, siç ka funksionuar deri më sot. Këshilli i bashkisë si institucion i zgjedhur dhe kryetari i bashkisë duhet të bëjnë argumentimin përkatës se nuk ngjan me një bashki pa burime ekonomike e njerëzore. Jo Patosi, jo Divjaka, jo Memaliaj!”
“U bëj thirrje të gjithë qytetarëve të Patosit, mos ta lëshojnë këtë bashki.”
Zëra kundër, socialistët kanë pasur edhe në mesin e tyre. Deputeti i Vlorës Vullnet Sinaj ka mbajtur qëndrimin e tij publik kundër shkrirjes së Bashkisë së Selenicës me Vlorën. Ai kërkon që të dëgjohen ekspertët dhe qytetarët. Nëse qeveria do të rriste financimin për pushtetin vendor, sipas Sinës nuk do të kishte nevojë të shkohej drejt uljes së numrit të bashkive.
Opozita e cila ka mbrojtur variantin e saj që e çon nga 61 në 100 numrin e bashkive, ka qenë e qartë që në fillim, kur e cilësoi propozimin e shumicës si një projekt politik dhe me qëllime elektorale. Tani ajo duket se po i gëzohet zërave kundër nga radhët e socialistëve por dhe qytetarëve në disa bashki të vendit.
gijotina.com/
Discussion about this post