Gazeta italiane “Il Manifesto” shkruan se kryeministrja e Italisë, Giorgia Meloni, po kërkon një zgjidhje të re për menaxhimin e emigracionit, pasi qendrat për emigrantët e ngritura në Shqipëri, në bazë të marrëveshjes me qeverinë shqiptare, rrezikojnë të mbyllen pas dy vitesh që, sipas medias italiane, kanë rezultuar të pasuksesshme.
Sipas artikullit, kriza e emigrantëve në Ceuta i ka dhënë Melonit mundësinë të rikthejë në qendër të debatit politik idenë e krijimit të qendrave për emigrantë në vende të treta, por këtë herë brenda një kuadri evropian.
“Il Manifesto” thekson se dy procese në pritje në Gjykatën e Drejtësisë së Bashkimit Evropian mund të ndikojnë drejtpërdrejt në të ardhmen e marrëveshjes mes Romës dhe Tiranës.
Sipas gazetës, marrëveshja me qeverinë shqiptare ngre pikëpyetje mbi përputhshmërinë e saj me të drejtën e Bashkimit Evropian. Në shkrim citohet edhe opinioni i Avokates së Përgjithshme Laila Medina, sipas së cilës Protokolli Romë–Tiranë bie ndesh me Traktatin për Funksionimin e Bashkimit Evropian, pasi shtetet anëtare nuk mund të lidhin marrëveshje që shkelin ose rrezikojnë të shkelin legjislacionin e BE-së.
Artikulli argumenton gjithashtu se qendrat e emigrantëve në Shëngjin dhe Gjadër nuk mund të përdoren lehtësisht për procedurat e përshpejtuara të azilit, pasi gjykatat italiane dhe ato evropiane kanë kundërshtuar qasjen e qeverisë Meloni mbi konceptin e “vendeve të sigurta të origjinës”.
Sipas “Il Manifesto”, Meloni po promovon tashmë krijimin e qendrave të kthimit për emigrantët në vende të treta, një ide që mbështetet nga disa shtete të Bashkimit Evropian, mes tyre Danimarka, Greqia, Gjermania, Austria dhe Holanda, ndërsa Franca dhe Spanja kanë shprehur rezerva.
Në artikull përmenden si vende të mundshme për ngritjen e këtyre qendrave Ruanda, Uganda, Uzbekistani dhe Kazakistani, ndërsa objekti në Gjadër shihet si një alternativë që mund të përdoret në kuadër të këtij modeli të ri evropian.
Discussion about this post