Një turist holandez dhe dy fëmijët e tij të mitur janë shpëtuar mbrëmjen e djeshme pasi mbetën të bllokuar në një zonë të vështirë të Kanioneve të Gjipesë, në Dhërmi.
Sipas Policisë, pas marrjes së njoftimit për situatën, u nis një operacion kërkim-shpëtimi nga shërbimet e Stacionit të Policisë Dhërmi, në bashkëpunim me Repartin Special “Delta Forcë”.
Operacioni zgjati rreth 4 orë dhe u zhvillua në kushte të vështira për shkak të terrenit të thepisur dhe errësirës. Forcat e shpëtimit arritën të lokalizojnë turistin dhe dy fëmijët, duke i nxjerrë nga zona pa lëndime.
Pas evakuimit, ata morën ndihmën e parë mjekësore dhe rezultuan në gjendje të mirë shëndetësore.
Turisti holandez falënderoi ekipet e ndërhyrjes për ndihmën e dhënë, duke deklaruar se zona ku kishin mbetur të bllokuar ishte veçanërisht e rrezikshme gjatë natës.
Njoftimi i Policisë:
Dhërmi / Mbetën të bllokuar në Kanionet e Gjipesë, Reparti Special “Delta Forcë” shpëton turistin holandez dhe dy fëmijët e tij të mitur.
Në kushte të një terreni shumë të vështirë dhe në errësirë, pas rreth 4 orësh operacion kërkim-shpëtimi, shërbimet e Policisë nxorën pa lëndime turistin dhe dy fëmijët e tij.
Shërbimet e Stacionit të Policisë Dhërmi, në bashkëpunim me Repartin Special “Delta Forcë”, mbrëmjen e djeshme përfunduan me sukses operacionin e kërkim-shpëtimit për një turist holandez dhe dy fëmijët e tij të mitur, të cilët kishin mbetur të bllokuar në një zonë të thepisur të Kanioneve të Gjipesë.
Menjëherë pas marrjes së njoftimit nga shtetasi holandez se kishte mbetur i bllokuar së bashku me dy fëmijët e tij, u organizua operacioni i kërkim-shpëtimit. Pas rreth 4 orësh kërkime intensive, në kushte të errësirës dhe në një terren tepër të vështirë, shërbimet e Policisë bënë të mundur lokalizimin dhe evakuimin e tyre në mënyrë të sigurt.
Pas nxjerrjes nga zona e rrezikshme, turisti dhe dy fëmijët e tij morën ndihmën e parë mjekësore dhe rezultuan në gjendje të mirë shëndetësore.
Turisti holandez falënderoi shërbimet e Policisë së Shtetit për profesionalizmin dhe përkushtimin e treguar gjatë operacionit, duke u shprehur:
“Dua t’u them të gjithëve se sonte jemi jashtëzakonisht mirënjohës ndaj Policisë lokale, e cila na shpëtoi nga vendi ku kishim mbetur të bllokuar. Ishte një zonë shumë e rrezikshme, sidomos gjatë natës. Këta tre efektivë janë heronj.”
Policia e Shtetit mbetet e angazhuar për t’u ardhur në ndihmë qytetarëve dhe turistëve në çdo rast emergjence, duke garantuar reagim të shpejtë dhe profesional.
Discussion about this post