Kryetarja në detyrë e Bashkisë Shkodër, Voltana Ademi ka bërë me dije ditën e sotme se nuk do të marrë pjesë në zgjedhjet e 6 marsit.
Me anë të një reagimi zyrtar, Ademi teksa tha se nuk do merrte pjesë në primaret e Komisionit të Rithemelimit ka bërë një bilanc për 7 vitet në krye të kësaj detyre. Ajo gjykon të mos futet në garë me një avantazh përballë të gjithë kolegëve të tjerë për disa arsye që i ka cituar në deklaratën e saj.
“Unë jam kryetarja në detyrë e Bashkisë së Shkodrës. Për shkak të këtij pozicioni, të pozicioneve të mëparshme publike që më janë besuar por edhe për shkak të angazhimit tim dhjetëra vjeçar në Partinë Demokratike, kam vendosur të mos marr pjesë në “primaret” që do të zhvillohen me 30 janar 2022 për përcaktimin e kandidatit për kryetar bashkie në Shkodër. Gjykoj se futem në garë me një avantazh përballë të gjithë kolegëve të tjerë, për arsyet që përmenda më sipër.” shprehet Ademi.
Ndërkohë nga ana tjetër, e pyetur nga mediat nëse do të pranonte një propozim të Lulzim Bashës për në bashkinë e Shkodrës ajo është shprehur që kreu aktual i PD-së as nuk guxon për t’i bërë një propozim të tillë.
“E kam ndarë mendjen se ku jam. Jam kundër zotit, Lulzim Basha. Jam e pozicionuar pa interesa. Nuk i shkon mendja Lulzim Bashës të ma thotë këtë, as nuk guxon.” tha Ademi
Së fundmi, e pyetur për kandidatët në Primaret e Komisionit të Rithemelimit, Ademi theksoi se ka qenë mbështetëse për to.
“Unë i kam mbështetur vetë.” u shpreh zonja Ademi.
Komisioni i Rithemelimit ka përpiluar Primaret, në gjashtë degët e partisë ku do të mbahen zgjedhjet e pjesshme lokale.
Po ashtu ditën e sotme janë bërë të ditur edhe emrat e kandidatëve që do të garojnë për votimet për Dibrën, Durrësin, Lushnjën, Rrogozhinën, Shkodrën dhe Vorën.
Discussion about this post