Përplasja mes UEFA-s dhe FIFA-s vazhdon të thellohet, me presidentin e FIFA-s, Gianni Infantino, që mbetet në qendër të polemikave.
Federata Evropiane e Futbollit ka konfirmuar se nuk do të ndryshojë qëndrim dhe se bojkoti ndaj kompeticioneve të FIFA-s mbetet në fuqi.
Deklarata e fundit e FIFA-s, ku organizata pranoi gabimin lidhur me projektin për privatizimin e Kupës së Botës, nuk ka bindur UEFA-n. Edhe pse FIFA shprehu “mbështetje të plotë” për Infantinon, kjo nuk ka ndikuar në pozicionin e institucionit të drejtuar nga Aleksander Čeferin.
“Qëndrimi ynë nuk ndryshon”, thuhet në reagimin e UEFA-s. Sipas saj, federatat evropiane kishin vendosur dy kushte të qarta për rikthimin në garat e FIFA-s: tërheqjen e propozimeve për privatizimin e kompeticioneve kryesore dhe garanci se iniciativa të tilla nuk do të përsëriten më në të ardhmen.
UEFA thekson se asnjë prej këtyre kushteve nuk është përmbushur. Për më tepër, organizata rithekson se ka humbur besimin te presidenca e Gianni Infantinos, një qëndrim që, sipas saj, mbetet i pandryshuar.
Federata evropiane minimizoi edhe deklaratën e fundit të FIFA-s, duke theksuar se fakti që disa persona të punësuar nga presidenti i FIFA-s mbështesin qëndrimin e tij “nuk ndryshon asgjë”.
Përplasja mes dy institucioneve më të rëndësishme të futbollit botëror pritet të vazhdojë edhe në ditët në vijim, ndërsa nuk përjashtohen reagime të reja nga të dyja palët.
Discussion about this post