Transferimi i Fisnik Asllanit te RB Leipzig ka dështuar në momentet e fundit, pavarësisht se marrëveshja mes palëve, përfshi edhe klubin e Hoffenheim ishte shumë pranë finalizimit. Sipas raportimeve të Sky Sport, operacioni është bllokuar për shkak të shqetësimeve të evidentuara gjatë kontrolleve mjekësore te sulmuesi i Kosovës.
Leipzig dhe përfaqësuesit e sulmuesit shqiptar kishin arritur dakordësinë për kushtet e transferimit dhe Asllani pritej të firmoste një kontratë afatgjatë me klubin gjerman, e cila do ta mbante atë në Leipzig deri në vitin 2031.
Marrëveshja parashikonte një paketë financiare prej rreth 25 milionë eurosh për Hoffenheim. Megjithatë, pavarësisht dakordësisë së arritur mes palëve, kontrollet mjekësore sollën një kthesë të papritur në negociata.
Drejtori i Hoffenheim ka folur në lidhje me këtë çështje. Andreas Schicker ka thënë se klubi i qendron pranë Asllanit, që sipas tij ka treguar nivelin më të lartë fizik dhe atletik në stërvitjet e zhvilluara me skuadrën.
“Fisniku ka bërë përparim të jashtëzakonshëm te Hoffenheim. Fakti që ky transferim nuk është realizuar është një lajm i keq për ne nga një perspektivë sportive. Është krejtësisht e qartë për ne se Fisniku është i aftë të performojë në nivelin më të lartë, si fizikisht ashtu edhe taktikisht.
Ne i qëndrojmë pranë lojtarit tonë. Fisniku dha një kontribut të rëndësishëm në suksesin tonë sezonin e kaluar, përfundoi stërvitjen parasezonale në nivelin e tij të lartë të zakonshëm dhe do të stërvitet përsëri me ekipin duke filluar nga java e ardhshme”, ka thënë Andreas Schicker, citon “Bild”.
Si pasojë e dështimit në testet fizike, Leipzig ka vendosur të tërhiqet nga operacioni dhe transferimi nuk do të realizohet. Dështimi i këtij operacioni vjen në një moment të rëndësishëm për Asllanin, i cili ishte pranë një tjetër hapi të madh në karrierën e tij.
gijotina.com/
Discussion about this post