Sulmuesi i Al-Hilalit, Darvin Nunez, duket se do të ribashkohet me Mohamed Salahun te Trabzonspori sezonin e ardhshëm. Këtë herë, megjithatë, uruguaiani do të ketë një pagë më të lartë se ylli egjiptian.
Sipas gazetës saudite Al-Yaum, që citon mediumin turk Sozcu, Al-Hilali ka rënë dakord që Nunez t’i bashkohet Trabzonsporit në këtë afat kalimtar veror në formë huazimi për një sezon.
Sulmuesi uruguaian do të vazhdojë të përfitojë pagën e plotë që merr aktualisht te Al-Hilali, e cila kap shifrën e 22 milionë eurove në vit. Kjo është 5 milionë euro më shumë sesa paga aktuale e Mohamed Salahut, i cili përfiton rreth 17 milionë euro.
Megjithatë, Trabzonspori do të mbulojë vetëm 8 milionë euro të pagës së Nunezit, ndërsa 14 milionë eurot e tjera do të paguhen nga Al-Hilali.
Klubi saudit është i interesuar ta largojë Nunezin, pasi uruguaiani nuk arriti të bindte gjatë pjesës së parë të sezonit të kaluar dhe më pas u la plotësisht jashtë listës së skuadrës për garat vendore në pjesën e dytë.
Nëse transferimi realizohet, kjo do të jetë hera e dytë që Salah dhe Nunez do të ndajnë të njëjtën dhomë zhveshjeje. Ata ishin bashkë te Liverpooli nga viti 2022 deri në vitin 2025, përpara se uruguaiani të transferohej te Al-Hilali.
Gjatë asaj periudhe, Salah ishte padyshim ylli kryesor i Liverpoolit dhe luajti një rol vendimtar në fitimin e titullit të dytë të Ligës Premier në historinë e klubit, trofe që “Të Kuqtë” e fituan pas një pritjeje prej pesë vitesh.
Ndërkohë, Salah iu bashkua Trabzonsporit në këtë afat kalimtar veror, duke nënshkruar kontratë dyvjeçare dhe duke i dhënë fund një aventure historike nëntëvjeçare me Liverpoolin, e cila kishte nisur në vitin 2017.
gijotina.com/
Discussion about this post