Një prej dëshmitareve të ngjarjes së rëndë në Korçë, Kozeta Shakla, ka rrëfyer momentet e para pasi u qëllua për vdekje 20-vjeçari Johan Zuko. Ajo tregon se ndodhej në banesë me nënën e saj kur dëgjoi një zhurmë të fortë. Fillimisht mendoi se dikush mund të kishte rënë në shkallë dhe doli për të parë se çfarë kishte ndodhur.
“Ajo gruaja e katit të tretë, te dera e saj ishte bërë ngjarja, thërriste me të madhe: ‘Aman, të lutem, lajmëroni policinë, ambulancën’. Ngjitem me vrap dhe shikoj një njeri të shtrirë përtokë, barkas”, tregon Shakla. Dëshmitarja thotë se në momentin kur iu afrua të riut, pa se ai ishte i gjakosur rëndë.
“Pashë djalin aty, njeri dy metra, djalë të shtrirë poshtë, të gjakosur. Pastaj i rridhte gjaku nga koka. Ishte tmerr”, shprehet ajo. Shakla tregon se menjëherë ka telefonuar ambulancën, ndërsa më pas ka mbërritur edhe Policia.
“Nuk e mblidhnim dot veten fare. Zbrita me vrap se më pyesnin nga ambulanca ku e kishit vendin. Pastaj erdhi policia dhe ikëm me ata”, rrëfen ajo. Dëshmitarja thekson se viktima nuk ishte banor i pallatit dhe se nuk e kishte parë më parë.
“Nuk e njohim fare. Nuk është i pallatit tonë. Nuk e di as ku banon. Thjesht e pashë aty”, thotë ajo. Ngjarja ka tronditur banorët e zonës, veçanërisht për shkak se bëhet fjalë për një pallat ku jetojnë familje dhe ku fëmijët luajnë çdo ditë. “Ne këtu na luajnë fëmijët përditë. Është një tronditje e madhe. Është tmerr i Zotit”, shprehet dëshmitarja. Ajo thotë se pamja e të riut të shtrirë dhe të gjakosur në shkallët e pallatit është një moment që nuk mund ta harrojë. “Nuk e harroj dot. Nuk e preka me dorë, nuk e preka me dorë”, përfundon ajo.
Discussion about this post