I dënuari me burgim të përjetshëm, Ardian Çapja, ka kërkuar leje për të dalë nga burgu dhe për të marrë pjesë në ceremoninë e varrimit të nënës së tij, e cila ka ndërruar jetë.
Çapja ndodhet në një institucion të sigurisë së lartë.
Kërkesa e tij është ende në shqyrtim, ndërsa për shkak të rrezikshmërisë së lartë dhe masave të sigurisë që kërkon shoqërimi i tij jashtë burgut, Drejtoria e Përgjithshme e Burgjeve ka kërkuar përfshirjen edhe të Policisë së Shtetit në planin e masave.
Nëse kërkesa miratohet, autoritetet duhet të përcaktojnë masat e sigurisë për lëvizjen e Çapjas drejt Elbasanit dhe qëndrimin e tij gjatë ceremonisë.
Kush është Ardian Çapja?
Ardian Çapja është një prej emrave të njohur në historikun e përplasjeve dhe atentateve kriminale në Elbasan. Ai është dënuar me burgim të përjetshëm për një vrasje të dyfishtë të ndodhur në Elbasan.
Emri i tij ka qenë prej vitesh i lidhur me një seri ngjarjesh të rënda kriminale në qytet, ndërsa vetë Çapja ka qenë edhe objekt i disa atentateve.
Një prej sulmeve më të bujshme ndaj tij ndodhi më 8 qershor 2020, kur u qëllua me armë nga distanca pranë banesës së tij në Elbasan.
Çapja u plagos në shpatull dhe, sipas të dhënave të bëra publike në atë kohë, plumbi kaloi pranë zemrës. Ai u dërgua fillimisht në spitalin e Elbasanit dhe më pas në Spitalin e Traumës në Tiranë, ku iu nënshtrua një ndërhyrjeje kirurgjikale.
Pas operacionit, ai doli jashtë rrezikut për jetën.
Hetimet e asaj kohe ngritën dyshime se atentatori kishte studiuar më parë lëvizjet e Çapjas dhe ishte pozicionuar në një distancë të konsiderueshme nga banesa për të realizuar sulmin.
Pikërisht për shkak të profilit të tij dhe historikut të përfshirjes në dosje të rënda kriminale, çdo dalje e mundshme e Çapjas nga institucioni i vuajtjes së dënimit kërkon masa të posaçme sigurie.
Për kërkesën e tij për të marrë pjesë në ceremoninë mortore të nënës ende nuk ka një vendim përfundimtar.
Discussion about this post