Tre shqiptarë janë dënuar nga një gjykatë në Austri për një grabitje të planifikuar në një banesë në Amstetten.
Sipas mediave austriake, dy prej të dënuarve janë me origjinë nga Kosova, ndërsa një 58-vjeçar është dënuar me burgim të përjetshëm.
Ky i fundit akuzohet për dy tentativa vrasjeje dhe armëmbajtje pa leje.
Dy bashkëpunëtorët e tij janë dënuar me nga katër vite burg, vendime që tashmë kanë marrë formë të prerë.
Ngjarja ndodhi rreth një vit më parë, kur grabitësit hynë në banesën e një çifti, duke besuar se aty fshiheshin 1.5 milionë euro.
Në banesë ndodhej një e moshuar, të cilën autorët e mbajtën nën kontroll dhe e kërcënuan me levë hekuri e lidhëse plastike.
Dy prej tyre kontrolluan banesën për para dhe sende me vlerë, ndërsa grabitja u ndërpre nga mbërritja e policisë.
Njëri prej autorëve u përfshi në shkëmbim zjarri me efektivët, ndërsa më pas u arrestua bashkë me një tjetër të dyshuar.
I treti arriti të largohej, por u arrestua pas tri ditësh. Në çantën e tij u gjetën radio komunikimi, shirit ngjitës dhe targa automjetesh.
Prokuroria i cilësoi këto sende si prova se grabitja ishte planifikuar me kujdes.
Të tre të pandehurit pranuan akuzat për grabitje, ndërsa mbrojtja pretendoi se nuk kishin pasur qëllim të ushtronin dhunë ndaj të moshuarës.
Pas ngjarjes, pensionistja pësoi pasoja të rënda psikologjike, përfshirë çrregullimin e stresit post-traumatik.
Gjykata vendosi t’i akordojë asaj 7,050 euro dëmshpërblim, ndërsa dy policët e përfshirë në incident do të marrin nga 5,000 euro secili.
Discussion about this post