Liverpooli ka konfirmuar një lëvizje të bujshme në strukturën e pronësisë së klubit anglez.
Themeluesi i Amazon, Jeff Bezos, dhe bashkëthemeluesi i Facebook, Eduardo Saverin, kanë investuar në një pakicë aksionesh të Liverpoolit.
Marrëveshja është bërë përmes 1892 Holdings, një konsorcium i drejtuar nga Amit Bhatia.
Në këtë grup investitorësh bëjnë pjesë edhe Mittal Family Trusts, K5 Sports dhe EE Capital.
Bezos është investitori kryesor në fondin K5 Sports, ndërsa Saverin përfaqësohet përmes zyrës së tij familjare.
Amit Bhatia, drejtuesi i konsorciumit, është dhëndër i manjatit indian të çelikut Lakshmi Mittal.
Ai ka qenë gjithashtu aksionar i Queens Park Rangers në Championship.
Liverpooli theksoi se investimi synon të mbështesë ambiciet afatgjata të klubit për rritje.
Sipas klubit, marrëveshja bashkon ekspertizë nga fusha e biznesit, teknologjisë dhe investimeve globale.
Bezos është një nga njerëzit më të pasur në botë, me një pasuri të vlerësuar mbi 240 miliardë euro.
Ndërkohë, pasuria e Saverin vlerësohet në rreth 28 miliardë euro.
Bashkëthemeluesi i Facebookut kishte qenë më herët pjesë e një konsorciumi që tentoi të blinte Chelsean në vitin 2022.
Presidenti i Fenway Sports Group, Mike Gordon, e cilësoi marrëveshjen si një hap në përputhje me strategjinë afatgjatë të Liverpoolit.
Ai tha se konsorciumi i ri ndan të njëjtën filozofi dhe vizion për të ardhmen e klubit.
Investimi i ri pritet t’i japë Liverpoolit edhe më shumë mbështetje financiare dhe ekspertizë ndërkombëtare në vitet e ardhshme.
Discussion about this post