“Protesta në 77 ditë krijoi një manifestim të ri politik”/ Marjana Koçeku: Politika e vjetër përqesh qytetarin dhe refuzon ta dëgjojë

Deputetja e pavarur, e larguar nga grupi i Partisë Socialiste, Marjana Koçeku, ka bërë një tjetër postim kundër kryeministrit Edi Rama ndërsa protesta e qytetarëve për largimin e tij nga pushteti ka hyrë në ditën e 78-të.

Në postim, ajo shkruan se protesta ka arritur të mbjellë atë që politika e 35 viteve nuk ka mundur dhe nuk ka dashur të bëjë. Sipas saj, ndërsa brezi i ri është zgjuar dhe po dëshmon një kulturë të re, politika e vjetër e refuzon.

“77 ditë protestë u deshtën për me mbjellë çka politika e 35 viteve as nuk ka mujtë, as nuk ka dashtë: vetëdijen se publikja dhe e përbashkëta na përkasin të gjithëve dhe se qytetari nuk asht spektator, por protagonist i vendit të vet.

77 ditë protestë për me kriju nji manifestim të ri politik. Për me tregu se pjesëmarrja qytetare, morali publik dhe përgjegjësia nuk janë veç fjalime retorike, por qëndrime dhe thelb i njeriut si pjesë e komunitetit dhe vendit ku jeton.

Kaq shumë e kaq pak kohë për me shfaqë dallimin e thellë mes brezit të ri dhe politikës së vjetrueme. Njani po zgjohet e po dëshmon nji kulturë të re; tjetri vazhdon me e përqeshë qytetarin e me refuzu me e ndigju.”, shkruan Koçeku.