Përplasje e fortë në FIFA, largohet drejtori që kritikoi Infantinon

Tensionet brenda FIFA-s kanë marrë një tjetër kthesë, pas përfundimit të marrëdhënies së punës me Kevin Lamour.

Drejtori operativ është larguar nga organizata pas kritikave të hapura ndaj presidentit Gianni Infantino.

Largimi u konfirmua përmes një letre të sekretarit të përgjithshëm Mattias Grafström drejtuar drejtuesve të FIFA-s.

Sipas dokumentit, ndarja mes palëve është bërë me marrëveshje të përbashkët.

Lamour kishte qenë ndër zërat më kritikë ndaj projektit të Infantinos për krijimin e një strukture private tregtare.

Projekti lidhet me Kupën e Botës dhe parashikonte hapjen e kapitalit të eventit ndaj investitorëve.

Vlera e planit ishte raportuar në rreth 20 miliardë dollarë, duke shkaktuar reagime të forta në botën e futbollit.

UEFA ishte ndër organizatat që kundërshtoi më fuqishëm nismën dhe madje kishte paralajmëruar një bojkot të mundshëm.

Lamour, 45 vjeç, kishte qenë për vite me radhë pranë Infantinos dhe kishte kontribuar në zgjedhjen e tij si president në vitin 2016.

Para se të angazhohej në futboll, francezi kishte punuar në politikë dhe kishte qenë bashkëpunëtor i Michel Platinit.

Në javët e fundit, ai kishte akuzuar drejtuesit e FIFA-s për mungesë transparence në menaxhimin e projektit.

Lamour kishte deklaruar gjithashtu se ishte “mashtruar” nga mënyra se si ishte menaxhuar operacioni.

“Punonjësit meritojnë diçka më të mirë se përçmimi dhe frikësimi”, ishte shprehur ai gjatë përplasjes.

Largimi i tij shton pikëpyetjet mbi përçarjet e brendshme në FIFA dhe të ardhmen e projektit të shumëdiskutuar të Infantinos.