Pretendim tronditës në gjyqin e Maradonës: Disa rezultate të analizave janë të babait të tij

Një zhvillim i papritur ka tronditur gjyqin për vdekjen e legjendës së futbollit, Diego Maradona.

Mbrojtja ka vënë në pikëpyetje autenticitetin dhe përkatësinë e disa dokumenteve mjekësore të përdorura si prova në proces.

Gjatë seancës së së enjtes, avokati Agustin Varela, që mbron infermieren Nancy Forlini, bëri një pretendim të fortë.

Sipas tij, disa rezultate të analizave për veshkat nuk i përkisnin Maradonës, por babait të tij.

Mbrojtja argumentoi se disa prej dokumenteve datojnë që nga viti 2015.

Në atë periudhë, Maradona ndodhej kryesisht në Dubai dhe jo në Argjentinë.

Babai i tij, Diego Salustiano Maradona, ndërroi jetë në qershor të vitit 2015.

Pikërisht për këtë arsye, mbrojtja kërkoi që dokumentet të verifikohen me kujdes.

Gjykata vendosi ta shtyjë seancën deri më 27 gusht për të përcaktuar kujt i përkasin analizat.

Në proces gjyqësor janë shtatë persona, mes tyre mjekë dhe kujdestarë që u përfshinë në kujdesin ndaj Maradonës.

Ata akuzohen për neglizhencë kriminale, por i mohojnë të gjitha akuzat.

Diego Maradona vdiq në nëntor 2020, në moshën 60-vjeçare, vetëm disa javë pas një ndërhyrjeje në tru.

Prokuroria pretendon se kujdesi mjekësor që iu ofrua në ditët e fundit nuk ishte i përshtatshëm për gjendjen e tij.

Ndërsa mbrojtja argumenton se Maradona vuante nga probleme të rënda shëndetësore dhe sëmundje kronike.

Tashmë, seanca e 27 gushtit pritet të sjellë qartësi mbi një prej pikave të rëndësishme të këtij procesi.