Kryeministri Edi Rama ka sulmuar delegacionin e Global Sumud Flotilla që mbërriti në Vlorë në mbështetje të protestave kundër zhvillimit të planifikuar turistik në Sazan, duke i etiketuar aktivistët si “revolucionarë të rrenave” dhe duke ironizuar misionin e tyre.
Tri anijet e flotiljes mbërritën nga Brindizi në Vlorë me aktivistë shqiptarë, italianë dhe ndërkombëtarë. Organizatorët e kishin paraqitur udhëtimin si një aksion solidariteti me protestën e “Flamingove” dhe kundërshtimin ndaj projektit turistik të lidhur me Jared Kushner, dhëndrin e presidentit amerikan Donald Trump. Udhëtimit iu dha edhe një simbolikë e veçantë, 35 vjet pas eksodit të anijes “Vlora”, këtë herë me Adriatikun të përshkuar në drejtimin e kundërt, nga Italia drejt Shqipërisë.
Por mbërritja e aktivistëve nuk kaloi pa një reagim të organizuar nga qeveria. Në Portin e Vlorës delegacionin e pritën zëvendësministrja e Kulturës dhe Turizmit, Marinela Prifti, dhe drejtoresha e Agjencisë Kombëtare të Turizmit, Jola Hysaj. Sipas versionit të dhënë nga Hysaj, aktivistëve iu ofrua të vizitonin Sazanin dhe të merrnin informacionin zyrtar mbi planet për ishullin, por ata nuk pranuan të shkonin dhe njoftuan se do të vazhdonin drejt Tiranës për t’iu bashkuar protestës.
Pikërisht këtë episod shfrytëzoi Rama për të goditur publikisht flotiljen.
Kryeministri shpërndau videon e Hysajt dhe i cilësoi aktivistët “revolucionarët e rrenave”, duke shkruar se “i ikin të vërtetës si djalli temianit” dhe se kanë “çoroditur dynjanë me marrëzitë e tyre”. Në të njëjtën kohë, ai komplimentoi Agjencinë Kombëtare të Turizmit dhe Ministrinë e Kulturës dhe Turizmit për atë që e quajti ironikisht “pritën” e bërë “çlirimtarëve të Sazanit”.
“Ehhhhh… këta revolucionarët e rrenave i ikin të vërtetës si djalli temianit, po ndërkohë çoroditën dynjanë me marrëzitë e tyre. Gjithësesi, një kompliment Agjencisë Kombëtare të Turizmit dhe Ministrisë së Kulturës e Turizmit për ‘pritën’ e bukur që u bënë çlirimtarëve të Sazanit”, ka shkruar Rama në rrjetet sociale.
Discussion about this post