Presidenti iranian: Marrëveshja me SHBA mbete mënyra më e mirë për t’i dhënë fund tensioneve

Presidenti iranian Masoud Pezeshkian ka mbrojtur memorandumin e mirëkuptimit me Shtetet e Bashkuara, duke argumentuar se ai përbën alternativën më të përshtatshme për uljen e tensioneve dhe për kapërcimin e ngërçit aktual mes Teheranit dhe Uashingtonit.

Presidenti i Iranit, Masoud Pezeshkian, ka dalë në mbështetje të memorandumit të mirëkuptimit me Shtetet e Bashkuara, në një kohë kur palët vazhdojnë të kenë mosmarrëveshje për çështjet kryesore, përfshirë programin bërthamor iranian.

Gjatë një fjalimi të publikuar nga agjencia shtetërore iraniane e lajmeve IRNA, Pezeshkian deklaroi se vendi i tij duhet të gjejë një rrugë për t’i dhënë fund situatës së pasigurt që ai e përshkroi si “as luftë, as paqe”.

Sipas presidentit, edhe anëtarët e Këshillit të Lartë të Sigurisë Kombëtare të Iranit e shohin memorandumin si marrëveshjen më të mirë që mund të arrihej në rrethanat aktuale, duke marrë parasysh interesat kombëtare të vendit.

Pezeshkian argumentoi se në vlerësimin e dokumentit janë marrë në konsideratë tri elemente kryesore: dinjiteti, mençuria dhe interesi kombëtar i Iranit.

Ai hodhi poshtë gjithashtu pretendimet se marrëveshja mund të shihet si një tërheqje e Teheranit përballë presionit amerikan. Sipas tij, memorandumi nuk përmban asnjë dispozitë që mund të konsiderohet si kapitullim ndaj Shteteve të Bashkuara.

Dokumenti lidhet me përpjekjet diplomatike mes Uashingtonit dhe Teheranit për të ulur tensionet dhe për të gjetur një zgjidhje për mosmarrëveshjet mbi programin bërthamor iranian.

Memorandumi u nënshkrua nga presidenti amerikan Donald Trump në qershor dhe përcaktoi një afat prej 60 ditësh për përfundimin e konfliktit me Iranin dhe arritjen e një marrëveshjeje për çështjen bërthamore.

Ky afat përfundoi javën e kaluar pa një marrëveshje përfundimtare mes dy vendeve.

Pavarësisht kontakteve dhe përpjekjeve diplomatike, Uashingtoni dhe Teherani nuk kanë arritur ende një kompromis për pikat kryesore të negociatave, veçanërisht për çështjet që lidhen me programin bërthamor të Iranit.

Deklaratat e Pezeshkian tregojnë se presidenca iraniane vazhdon ta konsiderojë dialogun me Uashingtonin si një rrugë për të kapërcyer tensionet, ndërsa negociatat mbeten pa një rezultat përfundimtar.