Një operacion i Drejtorisë së Përgjithshme të Burgjeve është zhvilluar në ambientet e IEVP Fushë-Krujë, ku gjatë kontrolleve është gjetur dhe sekuestruar një aparat celular që dyshohet se i përket të dënuarit Ramazan Rraja.
Sipas burimeve, telefoni është gjetur gjatë kontrolleve të ushtruara brenda institucionit të vuajtjes së dënimit dhe tashmë i është dorëzuar SPAK-ut.
Pajisja pritet t’i nënshtrohet ekspertizës në laboratorin dixhital, për të rikuperuar dhe analizuar të dhënat që mund të përmbajë. Në fokus pritet të jenë komunikimet, kontaktet dhe materiale të tjera të ruajtura në aparat, të cilat mund të ndihmojnë në përcaktimin e mënyrës se si është përdorur telefoni gjatë qëndrimit në burg.
Operacioni nuk është mbyllur me gjetjen e këtij aparati. Kontrollet vijojnë në ambientet e IEVP Fushë-Krujë, pasi ka dyshime se brenda institucionit mund të jenë futur dhe fshehur edhe telefona të tjerë celularë.
Autoritetet po punojnë gjithashtu për të dokumentuar mënyrën se si aparati ka përfunduar brenda burgut dhe nëse persona të tjerë mund të kenë ndihmuar në futjen apo përdorimin e tij.
Ramazan Rraja është një emër i njohur për drejtësinë dhe është dënuar nga Gjykata e Posaçme në dosjen e atentatit të 1 nëntorit 2019 ndaj ish-prokurorit Arjan Ndoja dhe Aleksandër Lahos, i njohur si “Rrumi i Shijakut”, ku mbeti i vrarë shoferi Andi Maloku.
Në tetor 2024, GJKKO e dënoi Rrajën me 6 vite burg. Në të njëjtën çështje u dënuan edhe Genti Ndërjaku me 5.4 vite, Bashkim Haxhia dhe Endrit Sinani me nga 4.8 vite, si dhe Julian Pjetri me 4.4 vite burg.
Sipas SPAK-ut, grupi kishte nisur që prej gushtit 2019 ndjekjen e Arjan Ndojës dhe Aleksandër Lahos dhe kishte siguruar armë e mjete për realizimin e atentatit. Prokuroria e Posaçme kishte kërkuar në total 43 vite burg për pesë të pandehurit, përpara aplikimit të uljes së dënimit për shkak të gjykimit të shkurtuar.
Atentati ndodhi në mbikalimin e Shkozetit, kur automjeti ku udhëtonin Ndoja, Laho dhe shoferi Andi Maloku u qëllua me breshëri. Maloku humbi jetën nga plagët, ndërsa Ndoja dhe Laho mbetën të plagosur. Për ekzekutimin e atentatit, Redjan Rraja është dënuar me burgim të përjetshëm, ndërsa Ariol Halili me 35 vite burg.
Gjetja e celularit hap tashmë një tjetër pistë verifikimi për autoritetet. Ekspertiza e SPAK-ut pritet të përcaktojë nëse pajisja është përdorur nga Ramazan Rraja, me kë është komunikuar dhe çfarë të dhënash mund të jenë ruajtur apo fshirë prej saj.
Paralelisht, vijimi i kontrolleve synon të zbulojë nëse bëhet fjalë për një rast të izoluar apo nëse brenda burgut të Fushë-Krujës qarkullojnë pajisje të tjera të palejuara.
Discussion about this post