Rafael Leao i ka dhënë lamtumirën Milanit përpara nisjes drejt Stambollit, ku pritet të nisë aventurën e re në futbollin turk me Galatasarayn.
Sulmuesi portugez foli për mediat në aeroportin e Linate, duke ndarë emocionet e ndeshjes së tij të fundit me fanellën kuqezi.
“Emocioni i ndeshjes sime të fundit në San Siro ishte i prekshëm. Doja të isha në fushë, të përshëndesja tifozët dhe të ndieja energjinë e tyre”, u shpreh Leao.
Ai falënderoi klubin dhe tifozët e Milanit, duke theksuar se që nga dita e parë në Milano ishte ndier si në shtëpi.
“Jam shumë i lumtur që vesha fanellën e Milanit. Fituam trofe të rëndësishëm dhe do ta sjell Milanin kudo”, deklaroi portugezi.
Leao pranoi gjithashtu se gjatë viteve të tij te Milani ka përjetuar edhe kritika nga tifozët dhe mediat.
“Kur ne futbollistët luajmë mirë, të gjithë flasin mirë. Kur nuk bën gjëra, është e drejtë që njerëzit të flasin”, tha ai me një buzëqeshje.
Duke folur për aventurën e re, sulmuesi u shpreh entuziast për klubin që po i bashkohet dhe objektivat në Ligën e Kampioneve.
“Një cikël mbaron, një tjetër fillon. Jam shumë i lumtur që filloj një aventurë të re në një vend të ri”, tha Leao.
Në fund, ai zbuloi edhe një detaj më të veçantë: do t’u mësojë turqve pasionin e tij për sërfin.
“Po, sigurisht”, u përgjigj Leao duke qeshur, përpara se të nisej drejt Stambollit.
Discussion about this post