Aktivisti Edison Lika ka folur në protestën e sotme, duke e cilësuar vijimin e tubimeve si një dëshmi të rezistencës së qytetarëve ndaj qeverisë.
Lika tha se protestat po i afrohen 100 ditëve, duke theksuar se ato kanë vijuar edhe gjatë muajve të verës, pavarësisht temperaturave të larta.
“Sapo kemi hyrë në rrugëtimin për 100 ditë protestë. E kush do ta mendonte se për tre muaj ky bulevard do të ushtonte me thirrjen e dorëheqjes.
Përveç tre muajve, ne kemi kaluar edhe muajt më të vështirë, me temperatura të larta, por qytetarët janë bashkuar për t’i dhënë goditjen e fundit këtij regjimi.
Imagjinoni, në temperatura që kalojnë 40 gradë, qytetarët mblidhen në shesh. Imagjinoni çfarë do të ndodhë në shtator dhe tetor. Imagjinoni kur ky bulevard ka qenë plot në ditët më të nxehta të gushtit, imagjinoni kur të rikthehen studentët dhe të mbushin sheshin”, tha Lika.
Ai komentoi edhe zhvendosjen e takimit qe kryeministri Rama beri me ministrat ne periferi të Tiranës.
“Ditën e djeshme, falë rezistencës suaj, ata e kanë ndërruar vendtakimin. Mund ta ndërrojnë vendtakimin e qeverisë, por nuk e ndërrojnë dot vendin e parlamentit. Vetëm nëse e kanë ndarë mendjen që parlamentin ta dërgojnë në Surrel, sepse nuk do t’u ikin dot shqiptarëve”, deklaroi aktivisti.
Discussion about this post