Ish-futbollisti i Kombëtares shqiptare, Igli Tare, është paraqitur këtë të hënë, 31 gusht, në Prokurorinë e Posaçme (SPAK), në kuadër të hetimeve që lidhen me dosjen “Balluku”.
Tare ka qëndruar për rreth tre orë në ambientet e SPAK-ut, ku mësohet se ka dhënë shpjegime përpara prokurorëve lidhur me çështjen që është në hetim.
Në përfundim të paraqitjes së tij, ish-futbollisti është përballur me gazetarët jashtë ambienteve të SPAK-ut, por ka zgjedhur të mos japë detaje mbi përmbajtjen e dëshmisë.
“Falënderoj mediat për mënyrën si e kanë transmetuar”, u shpreh shkurt Tare.
Nën hetim për pastrim parash
Igli Tare ndodhet nën hetim për veprën penale të pastrimit të parave, ndërsa emri i tij është përfshirë në hetimet e dosjes “Balluku”.
Në qendër të verifikimeve të SPAK-ut është një vilë në zonën e Dhërmiut, për të cilën prokurorët po hetojnë rrethanat e pronësisë, transaksionet financiare dhe lidhjet e mundshme me persona të tjerë të përfshirë në dosjen hetimore.
Më herët, në kuadër të të njëjtave hetime, ishte thirrur nga prokurorët e posaçëm edhe vëllai i Igli Tares, Agron Tare.
Hetimet vijojnë ndërsa SPAK po verifikon lidhjet financiare dhe pasurore të personave të përfshirë në dosjen “Balluku”. Paraqitja në SPAK dhe statusi i hetimit nuk nënkuptojnë fajësi, ndërsa çdo përgjegjësi penale duhet të përcaktohet përmes procesit të rregullt ligjor.
Discussion about this post