FSHF bën shembull presidentin e Vllaznisë, Alban Xhaferi: Vendimet e Komisionit të Disiplinës

Komisioni i Disiplinës dhe Etikës pranë FSHF-së ka zbardhur vendimet për incidentet e regjistruara në kampionat.

Presidenti i Vllaznisë, Alban Xhaferi, është pezulluar me 15 ndeshje nga të gjitha veprimtaritë sportive për sulm ndaj zyrtarëve të ndeshjes.

Gjatë kësaj periudhe, numrit një të klubit shkodran i ndalohet gjithashtu kategorikisht hyrja në të gjitha stadiumet. Ky dënim vjen pasi goditi me grusht arbitrin.

Trajneri Edi Martini është dënuar me 6 ndeshje pezullim për shkelje të rregullave të sjelljes dhe sjellje josportive.

Pjesë e sanksioneve te Vllaznia u bë edhe trajneri i portierëve, Elis Dervishaj, i cili u pezullua me 4 ndeshje.

Për dështim në organizimin dhe sigurinë e ndeshjes, AF Elbasani është gjobitur me 100 mijë lekë të reja.

Ndërkohë, tekniku i Dinamos, Ilir Daja, dënohet me 2 ndeshje pezullim për protesta ndaj vendimeve të arbitrave.

VENDIMET:

1. AF Elbasani, për mospërmbushje të përgjegjësive lidhur me rendin dhe sigurinë, për incidentet e ndodhura pas përfundimit të ndeshjes, si brenda ashtu edhe në afërsi të stadiumit, në bazë të neneve 8/1 dhe 17/1 të KDE, dënohet me gjobë në masën 100.000 (njëqind mijë) lekë.
2. Zyrtari i KF Vllaznia, Alban Xhaferi, për sulm ndaj zyrtarëve të ndeshjes, në bazë të nenit 14/1/l të KDE, dënohet me 15 (pesëmbëdhjetë) ndeshje pezullim nga veprimtaritë.

Në zbatim të nenit 6/2/c të KDE, zyrtarit i ndalohet hyrja në të gjitha stadiumet gjatë zhvillimit të veprimtarive sportive të organizuara nga FSHF, deri në përfundimin e dënimit.

3. Zyrtari i KF Vllaznia, Edi Martini, për shkelje të rregullave themelore të sjelljes së mirë dhe sjellje josportive ndaj zyrtarëve të ndeshjes, në bazë të neneve 13/2 dhe 14/1/j të KDE dënohet me 6 (gjashtë) ndeshje pezullim nga veprimtaritë.
4. Zyrtari i KF Vllaznia, Elis Dervishaj, për sjellje josportive ndaj zyrtarëve të ndeshjes, në bazë të nenit 14/1/j të KDE dënohet me 4 (katër) ndeshje pezullim nga veprimtaritë.
5. Zyrtari i FC Dinamo City, Ilir Daja, për protestë ndaj vendimeve të zyrtarëve të ndeshjes, në bazë të nenit 14/1/c të KDE, dënohet me 2 (dy) ndeshje pezullim nga veprimtaritë.
6. Pranimin e kërkesës së lojtarit të FK Partizani, Human Lancaster Rowan, për konvertimin e pjesës së mbetur të dënimit, bazuar në nenin 75 të Kodit të Disiplinës dhe Etikës.
7. Rrëzimin e kërkesës së Klubit të Futbollit Delvina, në lidhje me faljen e dënimit për zhvillimin e ndeshjeve pa spektatorë, si të pabazuar në Kodin e Disiplinës dhe Etikës.
8. Rrëzimin e kërkesës së lojtarit të KF Iliria, Brajan Selmani, si të pabazuar në Kodin e Disiplinës dhe Etikës.
9. Rrëzimin e kërkesës së lojtarit të KF Oriku, Bruno Telushi, si të pabazuar në Kodin e Disiplinës dhe Etikës.

Kundër vendimit lejohet ankim brenda 3 (tre) ditëve përpara Komisionit të Apelit.