Pas deklaratave të kryeministrit Edi Rama për gjobat dhe kontrollet ndaj bizneseve, deputetja e Partisë Demokratike, Jorida Tabaku, ka reaguar duke akuzuar administratën shtetërore se po ushtron presion të vazhdueshëm mbi sipërmarrjen.
Sipas Tabakut, gjobat nuk po shërbejnë më si një instrument për të luftuar informalitetin apo për të përmirësuar klimën e biznesit, por janë kthyer në një mekanizëm presioni që, sipas saj, favorizon korrupsionin dhe godet kryesisht sipërmarrjet që respektojnë ligjin.
Deputetja e PD-së solli në vëmendje edhe shifrat e penaliteteve të vendosura nga administrata tatimore. Sipas saj, vetëm gjatë viteve 2022 dhe 2023 janë vendosur rreth 4.6 miliardë lekë gjoba.
“Biznesi nuk vuan vetëm barrën e taksave të padrejta, por edhe zyrtarët e shtetit që trokasin në derën e biznesit korrekt me ligjin, ndërkohë që ndaj evazorëve mbyllin njërin sy dhe i falin”, deklaroi Tabaku.
Ajo pretendon se numri i ankesave nga qytetarët dhe sipërmarrësit ndaj administratës shtetërore është në rritje, duke ngritur pikëpyetje mbi mënyrën se si po ushtrohen kontrollet dhe vendosen penalitetet.
Sipas Tabakut, gjobat po përdoren jo thjesht si masë administrative, por si një mënyrë për të ushtruar presion ndaj biznesit dhe për të nxjerrë prej tij atë që ajo e cilëson si “taksa e korrupsionit”.
Deklaratat e deputetes së PD-së vijnë në një moment kur debati për kontrollet tatimore, gjobat dhe marrëdhënien e administratës me biznesin është rikthyer në qendër të diskutimit politik.
Discussion about this post