Kreu i grupit parlamentar të Partisë Demokratike, Gazment Bardhi, ka reaguar lidhur me intervistën e ish-zëvendëskryeministrit Arben Ahmetaj dhe përgjimet e publikuara të Ron Yeffet, duke i kërkuar SPAK-ut të administrojë materialet dhe të nisë një hetim të plotë për akuzat e ngritura.
Sipas Bardhit, deklaratat dhe materialet e publikuara ngrenë akuza për ndarje të pasurive publike, favorizim të interesave private, presion ndaj bizneseve dhe përdorim të parave publike jashtë rregullave dhe transparencës.
Një nga çështjet që kreu i grupit parlamentar të PD kërkon të hetohet lidhet me kompaninë shtetërore KAYO dhe pretendimet për një skemë të mundshme ndërkombëtare të armëve.
Bardhi thekson se nga materialet e publikuara ngrihen pretendime se armë me origjinë nga Afrika mund të paketoheshin në Shqipëri dhe më pas të dërgoheshin në zona konflikti.
Bardhi deklaroi se një çështje e tillë lidhet me sigurinë kombëtare, legjislacionin shqiptar dhe detyrimet ndërkombëtare të Shqipërisë si vend anëtar i NATO-s.
Në reagimin e tij, Bardhi ngriti akuza edhe ndaj ministrit të Mbrojtjes, Ermal Nufi. Ai e cilësoi ministrin si “marionetë politike” të Ron Yeffet dhe pretendoi se është vendosur në këtë detyrë për t’u shërbyer interesave të pushtetit.
Reagimi
Intervista e mbrëmshme e ish-Zëvendëskryeministrit Arben Ahmetaj dhe përgjimet e bëra publike ngrenë akuza jashtëzakonisht serioze për mënyrën se si funksionon pushteti i Edi Ramës.
SPAK duhet t’i administrojë këto materiale pa asnjë vonesë. Sepse ajo që pretendohet është tronditëse: ndarje pasurish publike, favorizim interesash private, presione ndaj bizneseve dhe përdorim i parave të shqiptarëve jashtë rregullave dhe transparencës.
Këto akuza provojnë se kemi përpara një sistem të kapjes së shtetit, jo një qeverisje normale.
Por më e rëndë është ajo që tregohet në lidhje me kompaninë shtetërore KAYO dhe mundësinë e trafikimit ndërkombëtar të armëve, me origjinë nga Afrika, për t’u paketuar në Shqipëri dhe më pas për t’u dërguar në zona konflikti.
Kjo nuk është një çështje që mund të mbyllet me një deklaratë politike. Kjo sepse kemi të bëjmë me një çështje që prek sigurinë kombëtare, ligjin shqiptar dhe detyrimet ndërkombëtare të Shqipërisë si vend anëtar i NATO-s.
Dhe pyetjet janë të thjeshta: Kush e drejton këtë mekanizëm? Kush jep urdhrat? Kush përfiton? Kush mban përgjegjësi? Përgjigjia është vetëm një: Edi Rama!
Dje u bë edhe më e qartë se Ministri i Mbrojtjes, Ermal Nufi, nuk është gjë tjetër veçse një marionetë politike e Ron Yeffet, i vendosur në atë detyrë për t’i shërbyer interesave të pushtetit dhe për të kryer, bashkë me të, punët më të pista të Edi Ramës. Një emër në një post të rëndësishëm, por pa peshën dhe integritetin që kërkon ajo detyrë, një tjetër dëshmi e mënyrës se si Rama e përdor shtetin si instrument të interesave të tij politike.
Shqiptarët nuk mund të kenë një shtet ku ligji zbatohet për qytetarin, ndërsa pushteti qëndron mbi ligjin. Nuk mund të kenë një shtet ku pasuria publike trajtohet si pronë private. Nuk mund të kenë një qeveri ku institucionet përdoren për interesa të një rrethi të ngushtë njerëzish.
Shqipëria nuk është pronë e Edi Ramës.
Pasuritë publike nuk janë pronë e Edi Ramës.
Institucionet nuk janë pronë e Edi Ramës.
Dhe Shqipëria nuk është biznesi i askujt.
Prandaj kërkojmë hetim të plotë dhe përgjegjësi për çdo shkelje që provohet. Pa mburojë politike. Pa standarde të dyfishta. Pa pandëshkueshmëri.
Edi Rama duhet të largohet.
Shqipëria ka nevojë për një shtet ku sundon ligji, jo një pushtet ku sundon interesi. Shqipëria duhet të marrë frymë. Shteti duhet t’u kthehet shqiptarëve.
Discussion about this post