Prokuroria e Posaçme ka reaguar lidhur me refuzimin e kërkesës së avokatëve të huaj të Erion Veliajt për të zhvilluar një takim me kryebashkiakun e Tiranës.
Avokatët kishin kërkuar takimin me Veliajn të zhvillohej deri në datën 10 shtator, duke argumentuar se ishte i nevojshëm për nënshkrimin e aplikimit për dërgimin e çështjes së masës së arrestit në Gjykatën Evropiane të të Drejtave të Njeriut në Strasburg.
SPAK ka reaguar në një njoftim zyrtar duke sqaruar se prokurorët kishin dhënë miratimin paraprak për zhvillimin e takimit, por pengesa lidhej me pamundësinë organizative të Drejtorisë së Burgjeve për ta realizuar atë në datën e kërkuar.
Po ashtu SPAK thekson se nuk ka pasur një refuzim të kërkesës për këtë takim, por vetëm një pamundësi për ta zhvilluar atë më 10 shtator, duke kërkuar që të përcaktohet një datë tjetër.
“Për sa i përket kërkesës për takim me të pandehurin më datë 10 shtator, duhet sqaruar se prokurorët e Prokurorisë së Posaçme kanë dhënë miratimin paraprak.
Për shkak të pamundësisë organizative të Drejtorisë së Burgjeve për ta realizuar takimin në atë datë, nga ana e prokurorëve është kërkuar që të propozohet një datë tjetër. Pra, pretendimi se Prokuroria e Posaçme nuk ka dhënë leje për takimin, nuk qëndron”, thuhet në reagimin e SPAK.
Discussion about this post