Dënimi ndaj ish-krerëve të UÇK-së, reagimet e avokatëve dhe mundësia për Apel

Gjykata Speciale në Hagë dënoi të mërkurën katër ish-krerët e UÇK-së me gjithsej 81 vjet burgim.

Hashim Thaçi dhe Jakup Krasniqi u dënuan me nga 25 vjet, Kadri Veseli me 18, ndërsa Rexhep Selimi me 13 vjet burgim.

Trupi gjykues i shpalli përgjegjës për disa vepra penale të lidhura me arrestime dhe ndalime të paligjshme, trajtim mizor, torturë dhe vrasje të paligjshme.

Pas aktgjykimit, reaguan menjëherë ekipet mbrojtëse të katër ish-krerëve të UÇK-së.

Avokati i Thaçit, Pier Rishar Prosper, e cilësoi vendimin si të padrejtë dhe tha se beteja ligjore do të vazhdojë.

Edhe mbrojtja e Kadri Veselit shprehu pakënaqësi dhe paralajmëroi shqyrtimin e hapave të mëtejshëm ligjorë.

Avokatja e Jakup Krasniqit, Venkateswari Alagendra, konfirmoi se aktgjykimi do të apelohet.

Ndërkohë, mbrojtja e Rexhep Selimit theksoi se vendimi është vetëm i shkallës së parë.

Sipas rregullave të Dhomave të Specializuara, palët kanë 30 ditë për të dorëzuar njoftimin për apel.

Ankesat shqyrtohen nga një Panel Apeli i përbërë nga tre gjyqtarë.

Paneli mund ta lërë në fuqi vendimin, ta ndryshojë aktgjykimin ose dënimin, apo në rrethana të caktuara ta kthejë çështjen për rishqyrtim.

Kjo do të thotë se dënimet e shpallura të mërkurën nuk janë ende përfundimtare.

Më tej, në rrethana të caktuara, ekziston edhe mundësia e një ankese para Panelit të Gjykatës Supreme.

Sa do të zgjasë procesi i Apelit mbetet e paqartë, ndërsa procedurat mund të zgjasin disa muaj.