Është mbyllur mbrëmjen e sotme protesta e 122-të kundër qeverisë dhe kryeministrit Edi Rama, e zhvilluar në Tiranë. Qytetarët u mblodhën fillimisht në sheshin “Skënderbej” dhe më pas marshuan drejt Kryeministrisë, ku vijuan fjalimet dhe thirrjet kundër qeverisë.
Kjo protestë shënon ditën e 122-të të qëndresës së qytetarëve, të cilët vijojnë të kërkojnë largimin e Edi Ramës nga detyra dhe ndryshimin e situatës politike në vend.
Kërkesat e protestuesve përfshijnë edhe krijimin e një qeverie teknike tranzitore me mandat 12-mujor, e cila, sipas platformës së tyre, do të përgatiste vendin për zgjedhjet e ardhshme.
Gjatë tubimit të sotëm, nga podiumi para Kryeministrisë folën disa aktivistë dhe protestues, të cilët përsëritën mesazhet e tyre kundër qeverisë. Një prej thirrjeve të përsëritura ishte kërkesa për dorëheqjen e kryeministrit, ndërsa protestuesit kanë kërkuar gjithashtu ndërhyrjen e institucioneve të drejtësisë për çështjet që ata ngrenë.
Aktivisti Edison Lika deklaroi nga protesta se qëllimi i tyre mbetet largimi i Ramës dhe i qeverisë, duke theksuar se pjesëmarrësit nuk do të tërhiqen nga sheshi. “Sot jemi në ditën e 122 të rezistencës. E kemi pasur seriozisht që nga fillimi kur e kemi thënë: nuk largohemi nga sheshi pa largimin e Ramës”, u shpreh ai.
Edhe aktivistja Arvina Lleshi rikujtoi kërkesat kryesore të protestës, duke vendosur në krye të tyre dorëheqjen e kryeministrit dhe qeverisë, si dhe ngritjen e një qeverie teknike tranzitore.
Gjatë mbrëmjes, nga protesta u përcollën edhe mesazhe për përfshirjen më të madhe të të rinjve. Aktivistë të ndryshëm u kanë bërë thirrje studentëve dhe të rinjve që t’i bashkohen tubimeve, ndërsa në shesh janë dëgjuar thirrje si “Pa rini nuk ka Shqipëri” dhe “Arrestoni Ramën”.
Protestuesit kanë deklaruar se nuk e konsiderojnë të përfunduar qëndresën dhe se tubimet do të vijojnë edhe në ditët në vazhdim, me kërkesën për ndryshim politik dhe largimin e qeverisë aktuale.
gijotina.com/
Discussion about this post