Drejtori i Policisë së Korçës, Vilson Bala, është paraqitur paraditen e kësaj të mërkure në ambientet e Prokurorisë së Posaçme, ku ka qëndruar për rreth 40 minuta.
Pas daljes nga Prokuroria e Posaçme, Bala u përball me pyetjet e gazetarëve, të cilët kërkuan të dinin arsyen konkrete të thirrjes së tij në SPAK.
Ai shmangu dhënien e detajeve për çështjen, duke u përgjigjur me ironi: “Nuk e di pse kisha një parandjenjë që do isha këtu”.
Paraqitja e tij në SPAK lidhet me çështjen e biznesmenit Ergys Agasi. Bala ka mbajtur poste të rëndësishme në strukturat e Policisë së Shtetit, mes tyre atë të drejtuesit të Policisë së Durrësit dhe të shefit të Operacionales në Tiranë.
Emri i Ergys Agasit është vendosur së fundmi në qendër të hetimeve të SPAK, pas arrestimit të tij në kuadër të dosjes së AKSHI-t. Hetimet rreth biznesmenit janë zgjeruar edhe në drejtime të tjera, ndërsa në dosjen hetimore kanë dalë komunikime dhe dokumente që kanë çuar në verifikimin e kontakteve të tij me zyrtarë dhe drejtues institucionesh.
Një tjetër zhvillim që ka marrë vëmendje është edhe lidhja e Ergys Agast me SHISH dhe Vlora Hysenin. Për këtë çështje është vënë nën hetim edhe ish-drejtuesja e Shërbimit Informativ të Shtetit, Vlora Hyseni, ndaj së cilës është caktuar masa e sigurisë “arrest në shtëpi”.
Paraqitja e Vilson Balës në SPAK vjen ndërsa Prokuroria e Posaçme vijon veprimet hetimore për të zbardhur të gjitha rrethanat dhe lidhjet që kanë dalë gjatë hetimit të dosjes së Ergys Agasit.
Discussion about this post