Katër të burgosur, mes të cilëve tre shqiptarë dhe një kolumbian, janë marrë të pandehur si organizatorë të revoltës së dhunshme të ndodhur më 1 tetor në burgun Don Bosco në Pisa të Italisë, ngjarje të cilën e transmetuan drejtpërdrejt në rrjetin social TikTok.
Mediat italiane bëjnë me dije se shqiptarët e akuzuar për drejtimin e revoltës janë Ilber Arshi (39 vjeç), Andrea Petroniq (43 vjeç) dhe Daniel Myrtaj (24 vjeç).
Ky i fundit ishte personi që realizoi transmetimin ‘live’ nga qelia, për çka ngarkohet edhe me akuzën e përdorimit të paligjshëm të telefonit brenda institucionit të ekzekutimit të dënimeve penale.
Personi i katërt i përfshirë si organizator është shtetasi kolumbian Jerson German Bolanos (39 vjeç).
Përveç organizimit të trazirave, katër të akuzuarit përballen edhe me akuzën e shkatërrimit të pronës, pasi dëmtuan rëndë një pjesë të madhe të sektorit ku vuanin dënimin. Për shkak të rrezikshmërisë, ata janë transferuar menjëherë në burgje të tjera të rajonit të Toskanës.
Revolta shpërtheu rreth orës 19:00 dhe degjeneroi në përplasje fizike mes të dënuarve dhe efektivëve të Policisë Penitenciare. Për të menaxhuar situatën dhe për t’u ardhur në ndihmë të lënduarve, në ambientet e burgut ndërhynë edhe disa mjete autoambulancë.
Sipas gjyqtarit të hetimeve paraprake, Domenico Vatrano, pjesëmarrësit kryen akte të hapura dhune, kërcënime dhe rezistencë ndaj urdhrave të forcave të rendit. Veç katër organizatorëve, autoritetet kanë identifikuar deri tani edhe 16 të burgosur të tjerë të përfshirë në trazira, ndërsa vijon puna për identifikimin e personave të tjerë.
Gjatë transmetimit në TikTok, të burgosurit dolën me fytyra të zbuluara dhe pa shenja me sipërfaqësore dhune, duke folur me radhë në italisht dhe shqip. Ata pretenduan se ishin dhunuar me shkopinj gome nga gardianët dhe kërkuan më shumë privatësi, duke deklaruar se kishin të drejtë të flisnin lirshëm në qelitë e tyre pa pasur frikë se po përgjoheshin.
Discussion about this post