Dy deputetë të Partisë Socialiste, Erion Braçe dhe Vullnet Sinaj, kanë dalë kundër propozimit për reformën e re territoriale me 46 bashki.
Në mbledhjen e grupit parlamentar socialist në fillim të kësaj jave, dy deputetët kanë shfaqur rezerva për propozimin për bashkimin e 15 bashkive.
Në fund të mbledhjes së grupit parlamentar socialist, drafti për hartën e re territoriale është hedhur në votim, ndërsa Braçe dhe Sinaj kanë votuar kundër.
“Më bën të shkoj drejt votës kundër”, mësohet të ketë thënë, ndër të tjera, Erion Braçe gjatë mbledhjes.
Propozimi i Partisë Socialiste parashikon uljen e numrit të bashkive nga 61 në 46, përmes shkrirjes së 15 bashkive.
Për miratimin e reformës territoriale në Kuvend nevojiten 84 vota.
Nëse qëndrimi i dy deputetëve socialistë nuk ndryshon, kjo mund të ndikojë në numrin e votave të nevojshme për miratimin e ndarjes së re territoriale.
Propozimi i PS për hartën e re territoriale parashikon uljen e numrit të bashkive nga 61 që janë aktualisht, në 46. Pra 15 prej tyre do të bashkohen me njësitë më të mëdha administrative që ndodhen pranë tyre.
Ky propozim ka hasur në kundërshti të forta jo vetëm nga opozita, por edhe nga vetë radhët e PS.
Shumica e kryebashkiakëve dhe anëtarëve të këshillave të bashkive që janë parashikuar të shkrihen, kanë kundërshtuar propozimin për hartën e re territoriale.
Discussion about this post