Një punonjës i Policisë së Shtetit është arrestuar në flagrancë në Prrenjas, pasi dyshohet se ka marrë para për të favorizuar një person ndaj të cilit ishte caktuar masa e sigurisë “arrest shtëpie”.
Bëhet fjalë për inspektor Çlirim Torrën, me detyrë specialist për Policinë e Zonës (SPZ) pranë Stacionit të Policisë Prrenjas, në varësi të Komisariatit të Policisë Librazhd.
Sipas hetimeve të kryera nga Agjencia e Mbikëqyrjes Policore, nën drejtimin e Prokurorisë së Elbasanit, polici dyshohet se ka marrë një shumë parash për t’i mundësuar shtetasit me inicialet A.R. të shkelte masën “arrest shtëpie” dhe të largohej nga banesa.
Ndaj Torrës rëndojnë dyshimet për veprat penale “Korrupsioni pasiv” dhe “Shpërdorimi i detyrës”.
Njoftimi i policisë:
Arrestohet në flagrancë punonjësi i Policisë, dyshohet se do të ndihmonte personin me “arrest shtëpie” të largohej nga banesa
Agjencia e Mbikëqyrjes Policore, nën drejtimin e Prokurorisë pranë Gjykatës së Juridiksionit të Përgjithshëm Elbasan, ka finalizuar një veprim hetimor, në kuadër të të cilit është arrestuar në flagrancë Inspektor Çlirim Torra, me detyrë SPZ pranë Stacionit të Policisë Prrenjas, Komisariati i Policisë Librazhd, DVP Elbasan.
Nga veprimet hetimore dyshohet se punonjësi i Policisë ka marrë një vlerë monetare për të favorizuar shtetasin me inicialet A.R., ndaj të cilit ishte caktuar masa e sigurisë “Arrest shtëpie”, duke i mundësuar shkeljen e kësaj mase dhe largimin nga banesa.
Në përfundim të veprimeve hetimore, ndaj Inspektor Çlirim Torrës rëndojnë dyshimet për kryerjen e veprave penale të “Korrupsionit pasiv” dhe “Shpërdorimit të detyrës”.
Veprimet procedurale janë kryer në bashkëpunim të ngushtë me Prokurorinë pranë Gjykatës së Juridiksionit të Përgjithshëm Elbasan. Hetimi vijon për dokumentimin e plotë të rrethanave dhe përgjegjësive të personave të përfshirë.
Agjencia e Mbikëqyrjes Policore do të vijojë me zero tolerancë ndaj korrupsionit, shpërdorimit të detyrës dhe çdo veprimi që cenon integritetin e punonjësve të strukturave ligjzbatuese.
Discussion about this post