Partia Socialiste ka rrëzuar me 76 vota kundër kërkesën e Partisë Demokratike për zhvillimin e një mocioni me debat në Kuvend lidhur me arrestimin e ish-drejtoreshës së SHISH, Vlora Hyseni, e akuzuar se ka ndihmuar me informacione sekrete Ergys Agasin gjatë arratisë.
Vendimi ka sjellë përplasje mes mazhorancës dhe opozitës, ndërsa kreu i PD-së, Sali Berisha, ka hedhur akuza të forta ndaj ish-drejtueses së shërbimit sekret dhe socialistëve.
Nga foltorja e Kuvendit, Berisha pretendoi se Hyseni ishte emëruar në detyrë me rekomandim të Aleksandër Vuçiçit, ndërsa akuzoi mazhorancën se po pengon një debat për një çështje që, sipas tij, përfshin drejtuesen e shërbimit sekret në veprimtari kriminale.
“Vlora Hyseni u emërua këshilltare e Padrion me rekomandim të Aleksandër Vuçiç. U emërua pasi presidenti dhe qeveria e Kosovës, e shkarkuan si të padenjë. Vlora Hyseni ishte shërbëtore e armiqve të Shqipërisë, ky ishte kriteri që u emërua. Pas emërimit, fluturimthi, shkoi në Beograd, do të ishte Beogradi kryeqyteti i parë që do vizitonte kjo drejtuese e SHISH. Që kur u emërua në atë detyrë, kontrollohej nga Ergys Agasi”, deklaroi Berisha.
Kreu i demokratëve akuzoi gjithashtu deputetët socialistë se, me rrëzimin e kërkesës për mocion, po bëhen pjesë e mbulimit politik të çështjes.
“Që ju të bllokoni një mocion të tillë, dëshmoni se çfarë jeni. Ju jeni anëtarë të klubit Agasi, fakti që pranoni një vendim të tillë antikushtetues ju bën ju bashkëfajtor me padrionon në këtë akt”, u shpreh ai.
Nga ana tjetër, kreu i grupit parlamentar të PS-së, Taulant Balla, kundërshtoi kërkesën e opozitës, duke argumentuar se hetimi i çështjes është kompetencë e SPAK dhe jo e politikës.
“Informacionet të cilave u referoheni në kërkesë vijnë nga një hetim i SPAK. Më vjen mirë që, kur ua do interesi juaj politik, ju u referoheni informacioneve të SPAK. Është momenti që të ndani qëndrimin tuaj. SPAK është seksion i PS-së, siç tha udhëheqësi juaj në derën e SPAK, apo është një institucion që për ne është suksesi i reformës në drejtësi?”, deklaroi Balla.
Ai theksoi se zbardhja e veprimtarisë së dyshuar kriminale duhet t’i lihet drejtësisë, pa ndërhyrje apo mbivendosje nga politika.
“Ju thoni që debati duhet të hetojë dhe të nxjerrë veprimtarinë kriminale. Ne themi që SPAK duhet të nxjerrë veprimtarinë kriminale. Koha kur politika gjykonte vetveten ka përfunduar me reformën në drejtësi. Pa asnjë ndërhyrje, pa asnjë mbivendosje”, tha kreu i grupit socialist.
Balla i bëri thirrje opozitës të ndalë sulmet ndaj prokurorëve të SPAK, duke nënvizuar se përgjegjësia penale është individuale dhe se çdo zyrtar duhet të përballet vetë me drejtësinë.
“Hiqni dorë nga sulmet ndaj prokurorëve të SPAK dhe rituali i turpit çdo të hëne para SPAK duhet të ndalet. Pafajësia ose fajësia e një zyrtari është përgjegjësi individuale dhe qëndrimi i PS për këtë çështje është që secili të marrë avokatin individual”, përfundoi Balla.
Discussion about this post