Deputetja e PD, Jorida Tabaku ka kritikuar mënyrën se si qeveria administron pronat publike, duke kërkuar që marrëveshjet për zhvillimin e tyre të bëhen publike dhe qytetarët të informohen për përfitimet konkrete që merr shteti nga këto projekte.
Tabaku ngriti një sërë pyetjesh mbi mënyrën se si përcaktohet vlera e pronave publike, si zgjidhen përfituesit dhe kush mban përgjegjësi për kushtet e marrëveshjeve.
“Prandaj unë kam një kërkesë të drejtpërdrejtë për kryeministrin, hapini këto marrëveshje përpara shqiptarëve. Publikoni vlerësimin e pronës. Publikoni alternativat që janë shqyrtuar. Publikoni kushtet dhe detyrimet. Tregoni përfituesit përfundimtarë”, deklaroi Tabaku.
Një pjesë e rëndësishme e kritikave të Tabakut lidhet me Korporatën e Investimeve Shqiptare, e cila mund të marrë në administrim prona nga institucionet qendrore dhe vendore për realizimin e projekteve të investimit.
“Korporata e Investimeve Shqiptare është në qendër të këtij shqetësimi. Një shoqëri shtetërore, e krijuar me ligj, që mund të marrë prona nga institucionet qendrore dhe vendore për projekte investimi. Mendoni për një çast fuqinë që i jep kjo. Prona që deri dje administrohej nga një institucion publik, mund të kalojë te Korporata. Më pas përfshihet në një projekt zhvillimi. Zgjidhet një partner. Negociohen kushtet. Përcaktohet çfarë merr secila palë. Në secilin prej këtyre hapave vendoset mbi pasurinë tuaj.
Prandaj unë kam një kërkesë të drejtpërdrejtë për kryeministrin: hapini këto marrëveshje përpara shqiptarëve. Publikoni vlerësimin e pronës. Publikoni alternativat që janë shqyrtuar. Publikoni kushtet dhe detyrimet. Tregoni përfituesit përfundimtarë. Dhe shpjegoni, me shifra, çfarë fiton publiku. Kush është kaq i bindur se po bën marrëveshjen më të mirë për Shqipërinë, duhet të jetë i gatshëm ta provojë. Sepse këtu kemi arsye konkrete për të kërkuar llogari. Kontrolli i Lartë i Shtetit e ka audituar Korporatën. Ka konstatuar mangësi në planifikim, mungesë metodologjish të standardizuara për projektet dhe mungesë analizash të detajuara për rreziqet e përfitimet“, u shpreh Tabaku.
“Prona është e shqiptarëve. Përgjigjen ua keni borxh shqiptarëve”, përfundoi ajo.
Discussion about this post