Deputeti i Partisë Demokratike, Agron Gjekmarkaj, ka kritikuar kryeministrin Edi Rama nga protesta që po zhvillohet në Tiranë, duke vënë në dyshim gatishmërinë e tij për dialog me studentët. Ai e krahasoi qëndrimin e kreut të qeverisë me tavolinën prej mermeri të vendosur përpara Kryeministrisë.
Në një prononcim për mediat, Gjekmarkaj u ndal edhe te sjellja e Policisë së Shtetit gjatë protestave, duke e akuzuar atë se ka vepruar në shërbim të pushtetit dhe jo në përmbushje të detyrës së saj.
Deputeti demokrat shprehu gjithashtu solidaritet me gazetarët që kanë raportuar nga terreni, duke theksuar shqetësimin për vështirësitë me të cilat janë përballur gjatë pasqyrimit të ngjarjeve.
Sa i përket pjesëmarrjes së opozitës në protestën studentore, Gjekmarkaj deklaroi se Partia Demokratike mbështet pa kushte studentët dhe pedagogët, por nuk synon të marrë drejtimin apo të monopolizojë tubimin e tyre.
“Aq sa ka disponibilitet kjo tavolinë mermeri për të dialoguar, aq ka dhe kryeministri vullnet. Tavolinë e ngurtë, e heshtur, që nuk flet. Sa i përket PD-së, ka 14 vite në protestë me kauzat që janë përfaqësuar nga elita e këtij vendi, që janë studentët dhe pedagogët. Një polici që u soll jo si Policia e Shtetit, por si klikë pushteti. Ju kemi ndjekur me ankth e shqetësim ju gazetarët se si jeni përballur në pasqyrimin e realitetit. Mbi opozitën është derdhur flakë dhe zjarr, për ta futur në konflikt të brendshëm. Opozita i ka kaluar këto sfida dhe kurthe, po bëhet më frymëzuese. Është solidare me çdo aksion, nuk do që të monopolizojë protestën e të tjerëve, por i jep asaj mbështetje pa kushte në çdo moment, siç është rasti i studentëve. Ka zëra minoritarë që nuk na duan, por duhet të dëgjohet populli, të kthehet një vend që nuk të merr votën, të patronazhon, s’ta merr votën me para të zeza.”, tha demokrati.
Discussion about this post