Kryetari i Bashkisë së Tiranës, Erion Veliaj ka liruar nga detyra dy nënkryetarët, Vasilika Vjero dhe Ilir Mëngra. Ndërkohë ka emëruar në këtë post Etleva Bishën.
Bisha është një emër me përvojë në Partinë Socialiste dhe në administratën publike. Ajo ka qenë ndër themelueset e FRESH-it dhe ka marrë pjesë në reformimin e shërbimeve sociale gjatë periudhës kur Erion Veliaj drejtonte ministrinë përgjegjëse për këtë sektor.
Në vitet e fundit, Bisha ka punuar në fushën e pushtetit vendor, duke bashkëpunuar me organizata ndërkombëtare që veprojnë në Shqipëri.
Por ndryshimet në Bashkinë e Tiranës marrin edhe një dimension politik, për shkak të zhvillimeve të një dite më parë dhe përplasjes së Veliajt me institucionet shtetërore për transferimin e tij në Burgun e Fierit.
Kryebashkiaku u transferua në mënyrë të beftë në këtë institucion, ndërsa sipas raportimeve është vendosur për dhjetë ditë në regjim survejimi, në një dhomë pa dritare.
Veliaj reagoi ashpër ndaj këtij qëndrimi, duke kërkuar dokumentacionin që justifikon klasifikimin e vendimit.
“U deshën 31 orë që më në fund të na thuhet se vendimi është sekret! Pra, jo vetëm që nuk na vihet në dispozicion akti, por synohet të na mohohet edhe mundësia për ta njohur, kundërshtuar dhe ankimuar efektivisht atë. Atëherë kalojmë në faqen tjetër të kësaj maskarade: nga arbitrariteti i vendimmarrjes te fshehja e saj pas sekretit shtetëror! Na vini në dispozicion autorizimin e Kryeministrit të vendit që ju autorizon si autoritet klasifikues”, deklaroi Veliaj.
Discussion about this post