Revolta nuk ndalet! Studentët marshojnë në rrugët e Tiranës, kërkojnë largimin e kryeministrit Rama

Studentët kanë bojkotuar mësimin ditën e sotme, duke zhvilluar një marshim në disa prej fakulteteve të universiteteve në Tiranë.

Protesta ka nisur nga Universiteti i Arteve, ku studentët janë larguar nga auditorët dhe më pas janë drejtuar drejt Fakultetit të Historisë dhe Filologjisë.

Marshimi ka vijuar te Fakulteti Ekonomik, Fakulteti i Drejtësisë dhe më pas te Fakulteti i Shkencave të Natyrës, ku u janë bashkuar edhe studentë të tjerë.

Gjatë lëvizjes së tyre, studentët kanë bërë thirrje për bojkotimin e mësimit, ndërsa ndër sloganet e artikuluara kanë qenë “Bojkotoni mësimin” dhe “Rama jep dorëheqjen”.

Po ashtu studentet kane thirrur njezeri: Rama ne burg, Berisha ne burg.

Ashtu si në ditët e mëparshme, ata synojnë të grumbullohen përpara Ministrisë së Arsimit për të kërkuar plotësimin e kërkesave të tyre.

Ndërkohë, grupe studentësh janë mbledhur edhe në shesh, ku bie në sy pjesëmarrja e një numri të madh vajzash. Marshimi ka sjellë bllokimin e qarkullimit të automjeteve në disa rrugë të kryeqytetit.

Prej ditësh, studentët kanë bojkotuar mësimin në auditore dhe kanë refuzuar ftesën e kryeministrit Rama për dialog, duke këmbëngulur në vijimin e protestave.