E rëndë në Gjermani, ministri i Ekonomisë gjendet i vdekur në dhomën e hotelit në Berlin

Ministri i Ekonomisë dhe zëvendëskryeministri i Bavarisë, Hubert Aiwanger është gjetur i pajetë në një dhomë hoteli në Berlin, në moshën 55-vjeçare.

Lajmi është konfirmuar nga autoritetet gjermane, ndërsa vdekja e politikanit ka shkaktuar tronditje në qarqet politike të vendit. Policia dhe Prokuroria e Berlinit kanë nisur hetimet për të përcaktuar shkakun dhe rrethanat e vdekjes.

Sipas raportimeve të mediave gjermane, Aiwanger ndodhej në Berlin për inaugurimin e zyrës së re të partisë së tij, Freie Wähler (Votuesit e Lirë), ku ishte planifikuar të mbante një fjalim.

Megjithatë, ai kishte anuluar pjesëmarrjen për arsye shëndetësore dhe ishte zëvendësuar nga një përfaqësues tjetër i partisë. Më pas, politikani nuk ishte bërë më i arritshëm dhe u gjet pa shenja jete në dhomën e hotelit Neuer Fritz, në qendër të kryeqytetit gjerman.

Deri më tani nuk është bërë i ditur shkaku i vdekjes. Prokuroria dhe policia kanë nisur një procedurë hetimore për të sqaruar rrethanat dhe për të përjashtuar mundësinë e përfshirjes së personave të tjerë.

Sipas raportimeve të fundit, autoritetet kanë planifikuar kryerjen e autopsisë për të përcaktuar shkakun e saktë të vdekjes. Hetimet vijojnë dhe deri tani nuk është konfirmuar zyrtarisht një shkak përfundimtar.

Kryeministri i Bavarisë, Markus Söder, ka shprehur tronditjen e tij pas lajmit për ndarjen nga jeta të zëvendësit të tij.