Moti i acartë dhe reshjet e borës në zona të caktuara kanë shkaktuar problematika në disa qytete. Të gjitha shkollat e njësive administrative Trebinjë dhe Velçan në bashkinë e Pogradecit, kanë pezulluar mësimin ditën e sotme.
Shkak është bërë bllokimi i rrugëve si rezultat i borës dhe për pasojë ka qenë e pamundur mbërritja e arsimtarëve në shkolla. Burime pranë zyrës arsimore Pogradec bëjnë me dije se ka pasur edhe shkolla të tjera në njësinë administrative Dardhas dhe Proptisht që për të njëjtat arsye nuk kanë zhvilluar mësim.
Nga ana tjetër, mësimi ka vijuar normalisht në të gjitha shkollat e bashkisë Korçë. Sipas drejtorit të zyrës arsimore Endri Pikuli, zhvillimi normal i mësimit është kryer në të gjitha institucionet arsimore. Përjashtim bën vetëm shkolla e Vithkuqit, atje ku mësimi ka filluar me vonesë për shkak të mbërritjes jo në kohë të stafit mësimdhënës. Me hapjen e rrugës drejt Vithkuqit, ka vijuar gjithçka normalisht.
Discussion about this post