Hapësira ajrore e Shteteve të Bashkuara është rihapur pas vendimit të Administratës Federale të Aviacionit (FAA) për të hequr ndalimin e përgjithshëm të ngritjes së avionëve. Megjithatë, situata në aeroportet amerikane mbetet e vështirë, me mijëra udhëtarë që vijojnë të përballen me anulime dhe vonesa të shumta.
Ndërprerja e pazakontë e fluturimeve, e ndodhur të premten, më 13 nëntor, u shkaktua nga një problem serioz në sistemet e komunikimit dhe kontrollit të trafikut ajror. Sipas autoriteteve amerikane, hetimet paraprake kanë evidentuar si shkak të mundshëm mbingarkesën e pajisjeve teknologjike të vjetruara.
Heqja e kufizimeve i hapi rrugë rifillimit gradual të trafikut ajror, por situata nuk është kthyer ende në normalitet. Të dhënat nga monitorimi i trafikut ajror tregojnë se gjatë së premtes u anuluan më shumë se 4,700 fluturime, ndërsa të paktën 10 mijë të tjera u regjistruan me vonesa. Probleme të ngjashme vijuan edhe të shtunën, kur u raportuan qindra anulime të tjera.
Ndikimi i kësaj ndërprerjeje pritet të ndihet edhe gjatë ditëve në vijim. Qëndrimi i avionëve në tokë ka krijuar një efekt zinxhir në operacionet e kompanive ajrore, të cilat tashmë po punojnë për të rikthyer avionët dhe ekuipazhet në aeroportet përkatëse dhe për të riorganizuar itineraret.
Edhe pse hapësira ajrore është rihapur, udhëtarët që planifikojnë të fluturojnë drejt apo brenda SHBA-së duhet të llogarisin mundësinë e vonesave, anulimeve dhe ndryshimeve të orareve, ndërsa kompanitë ajrore vijojnë përpjekjet për të rikthyer normalitetin në operacionet e tyre.
Discussion about this post