Dervishaj, pas seancës në Kushtetuese: Kuvendi bëri proces fiktiv

Përfaqësuesi ligjor i Presidentit Ilir Meta, Bledar Dervishaj ka dhënë një deklaratë për mediat pas seancës së dytë në Gjykatën Kushtetuese.

Dervishaj deklaroi se Kuvendi bëri një proces fiktiv, pasi atij i kishte mbaruar mandati për të shkarkuar Metën, ndërsa referuar Kushtetutës, tha se që në preambul përmendet parimi për një proces të rregullt ligjor.

“Në kushtetutën tonë, që në preambul dhe nenet fillestare përmendet parimi për proces të rregullt ligjor. Kur ky proces nuk u realizua nga Kuvendi i Shqipërisë, nuk mund të merremi me asgjë tjetër, sepse do të prodhonte pavlefshmëri. Kuvendi bëri një proces fiktiv, nuk ishte nga ato që të legjitimonin ngritjen e një komisioni hetimor. Sepse nuk kishte lëndë për të hetuar Presidentin. Ishte një material voluminoz me 170 faqe që prej datës 1 korrik. Presidenti ka kërkuar që në që 1 korrik të përfundojë brenda legjislaturës së vjetër që investoi më kot në GJK”, tha Dervishaj.

Seanca e radhës për shkarkimin ose jo të Presidentit Meta u vendos në datën 7 shkurt, ora 10:00.