Pasditen e sotme, në selinë e Partise Demokratike në Durrës, në praninë e dy nënkryetarëve Grida Duma dhe Agron Gjekmarkaj, deputetëve të qarkut Durrës u bë prezantimi i kandidatit Luan Hoti.
Takimi u hap nga nënkryetarja Grida Duma, e cila gjatë fjalës së saj u ndal në vlerat që përfaqëson kandidatura e Luan Hotit, jurist në profesion, si personi më i përshtatshëm për t’u zgjedhur në krye të bashkisë Durrës pas një qeverisjeje më shumë se 2 dekada të PS-së.
Sipas Dumës, përzgjedhja e kandidaturës së Hotit u bë pas një përzgjedhjeje dhe konsulteje të gjerë mes strukturave të PD-së lokale.
Njëkohësisht Duma theksoi se në mbështetje të Hotit do të vijë nga kryeqyteti një trupë e gjerë e strukturave qendrore, me qëllim dhënien e të gjithë suportit të nevojshëm për të arritur objektivin final, fitoren e bashkisë Durrës.
Ndërsa kandidati Hoti, i cili mban edhe postin e kreut të komanduar të degës lokale, u shpreh se ndihej i privilegjuar nga besimi që i kanë ofruar të gjitha strukturat dhe njëkohësisht premtoi se më 6 mars, bashkia do t’i rikthehet qytetarëve.
Për nënkryetarin e PD-së, Agron Gjekmarkaj, përzgjedhja e Hotit për garën e 6 marsit, është përzgjedhja e duhur, sepse vetëm kështu Durrësi do të shpëtojë nga kthetrat e mafies së betonit, për t’u kthyer në një bashki të qytetarëve dhe për qytetarët.
Discussion about this post