Drejtori i Drejtorisë së Kulturës në Komunën e Bujanofcit, Granit Sadriu, ka bërë të ditur se i ka ardhur ftesë nga gjykata në Serbi që të paraqitet në gjyq. Sipas Sadriut, ftesa për t’u paraqitur në gjyq vjen pasi drejtoria të cilën ai e udhëheq ka arritur që ta siguroi sallën për mbajtjen e festës së 28 nëntorit.
“Për të shënuar 109 vjetorin e pavarësisë së Republikës së Shqipërisë, normalisht vendosëm edhe flamurin shqiptar. Sepse nuk mund të kremtohet kjo ditë pa simbolin e saj më emblematik” – ka shkruar Sadriu.
Ai thotë se kjo ftesë për gjyq është përndjekje në baza etnike, dhe se procesi gjyqësor nuk është gjykim personal kundër tij, por edhe gjykim kundër një përfaqësuesi politik të komunitetit shqiptar.
“Më shumë se kaq, është pjesë e një megaplani shtetëror të Serbisë për spastrim etnik të shqiptarëve nga trevat tona në Kosovën Lindore. Sikur fshirja sistematike e adresave, përmes strategjive të tilla të depërtimit, Serbia synon ta bëjë të pamundur jetesën në shtëpitë dhe vatrat tona” – shkroi tutje Sadriu,
Sadriu më tej u bëri thirrje institucioneve të Kosovës e Shqipërisë që të marrin masa e ta rikthejnë Luginën në agjendë politike.
Përveç Kosovës e Shqipërisë, Sadriu i bëri thirrje edhe BE-së që të ushtrojë trysni mbi Serbinë që ajo të trajtojë shqiptarët në përputhje me standardet ndërkombëtare.
“Apeli im është jehonë e lutjes së shqiptarëve që po përballen me valë të pandërprera të elaborateve serbe për zbrazjen e këtyre viseve nga popullata e saj autoktone shqiptare. Kërkojmë nga vëllezërit tanë në Kosovë dhe Shqipëri që të mos lënë në harresë një pjesë të ndërgjegjes kombëtare në harresë dhe në mëshirën e tiranëve të Beogradit. Pamundësisë sonë për të shprehur lirshëm e me krenari simbolet dhe identitetin tonë duhet t’i vije fundi dhe kjo mund të ndodhë vetëm përmes bashkimit të Kosovës Lindore me shtetin amë të Kosovës” – shkruan Sadriu.
Ai bëri lutje që thirrjet e tyre të dëgjohen derisa, sipas tij, të jetë e mundur të flasin nga atje, teksa tha se një ditë ndoshta s’do ta kenë as këtë të drejtë.
Discussion about this post