Gjyqtarja e Tiranës, Shefkie Demiraj, urdhëroi pushimin e çështjes ndaj ish-kryebashkiakut socialist të Vorës, Agim Kajmaku. Mësohet se ditën e sotme, prokurori i çështjes, Ardiano Dyrmishi, ka vendosur të apelojë vendimin e gjykatës së kryeqytetit, duke kërkuar deklarimin fajtor dhe dënimin me 1 vit burgim të Kajmaku. Në pretencë, prokuroria kërkonte që dënimi me burg të pezullohej dhe Kajmaku të vuante një alternativ. Por edhe kjo kërkesë e prokurorisë nuk është pranuar nga Gjykata që ka urdhëruar pushimin e plotë të dosjes.
Organi i akuzës kishte kërkuar një masë dënimi alternative për Agim Kajmakun, duke i qëndruar vetëm vepër penale të “Falsifikimit të dokumentave”, ndërsa dy akuzat e tjera si “Falsifikimi i vulave, stampave ose formularëve” dhe “Kryerja e funksionit pas dhënies fund të detyrës”, ishin pushuar gjatë fazës së leximit të pretencës. Ish-kryebashkiaku i Vorës, Agim Kajmaku u akuzua se kishte firmosur shkarkimin nga detyra të dy nën/kryetarëve të bashkisë Vorë, në një kohë kur vetë Kajmaku ishte shkarkuar nga detyra, si zyrtar i prekur nga ligji dekriminalzimit.
Në atë periudhë Bashkia e Vorës pretendoi se shkarkimi nga detyra i nën/kryetarëve është bërë në 30 Tetor, një ditë para shkarkimit që KQZ-ja i bëri Kajmakut në 1 nëntor. Kajmaku dyshohet se ka falsifikuar datën e vendimit të shkarkimit të dy nën/kryetarëve të Bashkisë, ndaj dhe prokuroria i qëndroi deri në fund kësaj akuze, duke kërkuar dënimin e ish-zyrtarit të PS. Më vonë ai u shpall në kërkim dhe u prangos në një spital e për shkak të gjendjes së tij shëndetësore nuk u mbyll në qeli.
Discussion about this post