Familjet në vend vazhdojnë të vuajnë nga papunësia dhe si pasojë kanë shtuar borxhet. Kështu deklaron Banka e Shqipërisë në një raport të publikuar pak ditë më parë, ku përfshihet analiza e 2 muajve të fundit të 2021 dhe janari i këtij viti. Në raport thuhet se gjatë këtyre tre muajve punësimi ka shënuar një rritje, por që mbetet i papërfillshëm përballë nivelit të lartë të papunësisë.
Ndërsa thekson si shqetësimin më të madh, faktin që përqindja më e lartë deri në 25% e të papunëve regjistrohet tek të rinjtë. Ndër të tjera BSH thekson se punësimi ecën në ritme shumë të ngadalta në raport me çmimet në treg dhe inflacionin tepër të luhatshëm.
“Rritja e ekonomisë është shoqëruar me rritje të punësimit dhe reduktim të shkallës së papunësisë. Punësimi u rrit me 13 mijë persona në tremujorin e dytë të vitit në krahasim me një vit më parë, ndërsa shkalla e papunësisë zbriti në nivelin 11.6%. Megjithatë, pavarësisht kësaj tendence përmirësuese, punësimi dhe shkalla e papunësisë nuk kanë arritur ende nivelet para pandemisë, niveli i papunësisë në muajt e fundit shfaqet i dobët dhe rritja e papërfillshme përball tregut. Po ashtu, presionet për rritjen e pagave janë të moderuara, çka ilustrohet në rritjen e ngadaltë të tyre. Në të kundërt, kostot e tjera të prodhimit kanë përshpejtuarritmin e rritjes”, thuhet në BSH.
Ndër të tjera në raport evidentohet se familjet shqiptare janë shyur në borxhe pasi nuk kanë aftësi paguese ndaj bankave për kreditë e marra. Madje, sipas raportit po vjen në rritje përqindja e familjeve që nuk kanë aftësi paguese as ndaj shportës bazë, e cila ka kaluar në çmime rekord. E gjithë kjo vjen për shkak se pagat mbeten shumë të ulta, ndërsa inflacioni ndikon tek çmimet.
“Ecuria e ekonomisë dhe e inflacionit rrezikohet në kahun e poshtëm nga përkeqësimi i situatës epidemiologjike dhe nga gjurmë më afatgjata që pandemia mund të lërë në hezitimin e familjeve dhe bizneseve kundrejt shpenzimeve dhe investimeve, për shkak se të dhënat tregojnë që familjet kanë rritur këstet e papaguara në bankë, pasi nuk kanë aftësi paguese. Në kahun e sipërm, ecuria e inflacionit rrezikohet nga një konsolidim fiskal më i ngadaltë dhe nga një rritje më e qëndrueshme se vlerësimet aktuale të inflacionit botëror, pasi pagat po rriten në nivel të ulët krahasuar me rritjen e çmimeve”, theksohej në raport. Sakaq, kujtojmë se që nga fundi i 2021 në vendin tonë janë rritur njëherësh çmimi i energjisë, disa taksa dhe çmimet e ushqimeve bazë. Ndërsa vetëm pak ditë më parë çmimi i naftës kaloi në shifra rekord, 200 lekë për litër.
Discussion about this post