Kuvendi i Shqipërisë do të mblidhet ditën e sotme në orën 10:00, ku pritet të votohen anëtarët e Komisionit Zgjedhor dhe Territorial. Kreu i grupit parlamentar i PS-së, Taulant Balla tha dy ditë më parë se kanë dhënë aprovimin për ngritjen e 2 komisioneve dhe sot do të votohet për përbërjen e tyre.
Balla shtoi se secili nga komisionet do të ketë nga 8 anëtarët të PS-së, ndërsa bashkëkryetar i komisionit për reformën zgjedhore do të jetë Damian Gjiknuri. Mandati për komisionet do të jetë 6 mujor pasi sipas tij janë të mjaftueshëm për të hulumtuar e për të vlerësuar propozimet.
Vetëm dje, PS zbardhi emrat Komisionit për Reformën Zgjedhore. Mësohet se deputetët e propozuar janë: Toni Gogu, Ermonela Felaj, Klotilda Bushka, Blerina Gjylameti, Klevis Xhoxhi, Blendi Klosi, Arben Pëllumbi ndërkohë që bashkëkryetar do të jetë Damian Gjiknuri.
Ndërsa nga selia blu, Basha pritet të caktojë drejtues politik të Reformës Territoriale Gazment Bardhin, ndërsa drejtues teknik, Roland Bejkon. Po ashtu, është mësuar se anëtare do të jetë deputetja Dhurata Çupi, ndërsa në diskutim janë Bledion Nallbatin e Greta Bardhelin.
Discussion about this post