Partia Demokratike ka publikuar pak më parë pak nga rezultatet e mbledhjes së fundit të Komisionit Hetimor për Inceneratorët. Në një postim në Facebook, PD tregon se nga dëshmitë e fundit u vërtetua se në këtë aferë janë përfshirë Engjëll Agaçi dhe zëvendëskryeministri Arben Ahmetaj.
Sipas PD, Rama dhe “kokat kryesore” të kësaj afere kërkojnë të lajnë duart dhe të ngarkojnë përgjegjësitë mbi ministrat. “Komisioni Hetimor për aferën e inceneratorëve çdo ditë po zbardh arsyet pse Edi Rama nuk mund të lajë duart nga përgjegjësia për vjedhjen prej 430 milionë euroshe, duke ua hedhur fajin vetëm ministrave, të cilët shumë shpejt do përballen me drejtësinë. Ja çfarë u vërtetua në seancën e tretë:
Në Agjesinë e Prokurimeve Publike nuk ekziston asnjë procedurë koncesioni për inceneratorin e Elbasanit; APP ka njoftuar Engjëll Agaçin se procedura për inceneratorin e Elbasanit nuk ishte ligjore. Agaçi përgatiti VKM-në dhe kaloi mbështetjen financiare; Koncesioni i inceneratorit të Elbasanit i është dhënë “Albtek Energy” me “negocim pa shpallje”, procedurë që ligji nuk e parashikon;Arben Ahmetaj jep miratimin për t’i dhënë kompanisë “Albtek Energy” koncesionin/PPP me “negocim pa shpallje” një procedurë që është në kundërshtim me ligjin”, thuhet në postim.
Ndërsa bëhet e ditur që në seancën e radhës do të vazhdojnë diskutimet për faktin që të tre Inceneratorët nuk kanë marrë lejen e nevojshme mjedisore.
Discussion about this post